„პოლიცია სიტუაციის მსხვერპლია“ - მარიტა მუსელიანი

„არავის მოვუწოდებთ, ფორმა გაიხადოს," - ამის შესახებ რიონის ხეობის მცველი მარიტა მუსელიანი აცხადებს.

მისი თქმით, პოლიცია სიტუაციის მსხვერპლია, რადგან სახელმწიფოს ხელშეკრულების შესრულება უწევს და ამასში პოლიციას იყენებს.

"ფორმის გახდის მისალმება ჩვენ არ შეგვიძლია. ჩვენ არ შეგვიძლია, მოვუწოდოთ ძალოვანი სტრუქტურების წარმომადგენლებს, გაიხადონ ფორმა და დატოვონ სამსახური. რასაკვირველია, ადამიანებს ყველა ადგილზე აქვთ პროტესტის გრძნობა. პოლიციელს რაც შეეხება, ისიც ამ სიტუაციის მსხვერპლია. ხელშეკრულების შესრულება უწევს სახელმწიფოს და ამაში იყენებს საპოლიციო ძალებს"- განაცხადა მუსელიანმა.

ვარლამ გოლეთიანის თქმით კი, ხშირია შემთხვევები, რომ მათ მხარდაჭერას უცხადებენ და სამსახურის შესაძლო დატოვების შესახებ ეუბნებიან.

"მოსულან ადამიანები, რომლებიც არიან სამხედრო სავალდებულო სამსახურში, არ ვგულისხმობ წვევამდელებს, ვგულისხმობ ხელფასიან ადამიანებს, მათ უთქვამთ, რომ თუ საჭირო გახდება, ისინი წამოვლენ, დატოვებენ სამსახურს და დადგებიან სიმართლის მხარეს", - აცხადებს ვარლამ გოლეთიანი.

შეგახსენებთ: რიონის ხეობის მცველების სოლიდარობის მიზნით, პოლიციელმა ზურაბ ხმელიძემ და ჯარისკაცმა ნიკოლოზ კვანჭიანი სამსახური დატოვეს.