„ეს სოციალური მუშაკების მიერ გამოსავლენი საკითხია“ - შალვა პაპუაშვილი ნინოწმინდის პანსიონზე

„საქმე გვაქვს არასრულწლოვნებთან და აქედან გამომდინარე, მნიშვნელოვანია, რომ ემოციური ფონი იყოს სათანადო იმისთვის, რომ სოციალურმა მუშაკებმა შესაბამისად იმუშავონ", - ასე ეხმაურება, საპარლამენტო უმრავლესობის წევრი, შალვა პაპუაშვილი, ნინოწმინდის ბავშვთა პანსიონის გარშემო გამოწვეულ მაღალ საზოგადოებრივ ინტერესს.

მისივე თქმით, პანსიონატში არსებულ შესაძლო დარღვევებთან და გადაცდომასთან დაკავშირებით, შესაბამისი დასკვნა სოციალურმა მუშაკებმა უნდ დადონ, რომლებიც ამ საკითხზე მუშაობენ.

„თუკი არის სავარაუდო დარღვევები, ეს სოციალური მუშაკების მიერ გამოსავლენი საკითხია, ასევე ამ საკითხებს იკვლევს შინაგან საქმეთა სამინისტრო. თუ ასეთ დარღვევას ადგილი აქვს, საჭიროა, რომ ამას პროფესიონალებმა შეხედონ და შეაფასონ",- განაცხადა ჟურნალისტებთან საუბრისას პაპუაშვილმა.

ცნობისთვის: სოციალური მუშაკები და მეუფე სპირიდონი ერთმანეთს დღეს შეხვდებიან და ნინოწმინდის პანსიონატში არსებულ სიტუაციაზე ისაუბრებენ.