„ორი „ოცნების" ჩხუბი და დავიდარაბა არავის აინტერესებს," - განაცხადა დღეს, 7 ივნისს, „ნაციონალური მოძრაობის" დეპუტატმა ლევან ხაბეიშვილმა ყოფილი პრემიერის, ბიძინა ივანიშვილის განცხადების კომენტრებისას.
შეგახსენებთ: დღეს, „ქართული ოცნების" დამფუძნებელმა, ბიძინა ივანიშვილმა განცხადება გაავრცელა, სადაც გახარიას მიერ გუნდისა და სახელმწიფოს ღალატზეა საუბარი.
ხაბეიშვილის თქმით, ხალხის უკიდურესი გაჭირვების ფონზე, მათ მხოლოდ საკუთარი გავლენები, ამბიციები და კეთილდღეობა აღელვებთ.
„შიდა ინტრიგების მეტი რომ არაფერი ადარდებთ, უკვე ტრაგედიაა. ადამიანებს უკიდურესად უჭირთ და ამათ მხოლოდ გავლენები, საკუთარი ამბიციები და კეთილდღეობა აღელვებთ. ოლიგაქრის ეს განცხადებაც აჩვენებს მათ უპასუხისმგებლო დამოკიდებულებას. არავის აინტერესებს ორი „ოცნების" ჩხუბი და დავიდარაბა. საქმეს მიხედონ და ხალხს,"- განაცხადა ხაბეიშვილმა
შეგახსენებთ, „ქართული ოცნების" თავმჯდომარის ირაკლი კობახიძის განცხადების შემდეგ, რომელიც თავად ოცნების მხარდამჭერებმაც არასერიოზულად მიიღეს, საგანგებო განცხადება დღეს ბიძინა ივანიშვილმა გააკეთა, სადაც გიორგი გახარიას ღალატის შესახებ ისაუბრა.