სამოქალაქო საზოგადოების 11-მა ორგანიზაციამ წარმოადგინა დოკუმენტირების ანგარიში — „ადამიანის უფლებების კრიზისი საქართველოში 2024 წლის საპარლამენტო არჩევნების შემდგომ“. ანგარიში ასახავს 2024 წლის 28 ნოემბრიდან 2025 წლის 28 თებერვლამდე პერიოდში პროტესტის ჩახშობის მიზნით განხორციელებულ მძიმე და სისტემურ დარღვევებს.
ანგარიში ეფუძნება საჯარო წყაროებსა და ინტერვიუებს ძალადობის მსხვერპლებთან. ინტერვიუ ჩატარდა 117 პირთან, რომელთაგან 91 მიუთითებს პოლიციის მხრიდან ძალადობასა და არასათანადო მოპყრობაზე. დოკუმენტში აღწერილია წამების და არასათანადო მოპყრობის სისტემური ხასიათი.
ანგარიში ასევე მიმოიხილავს შეკრებისა და გამოხატვის თავისუფლების, ასევე მედიის წინააღმდეგ განხორციელებულ დევნას. მხოლოდ მედიის წარმომადგენლების წინააღმდეგ 108 ძალადობის ფაქტია დოკუმენტირებული.
დოკუმენტი ასახავს პროტესტის დასაშლელად ადმინისტრაციული და სისხლის სამართლის ბერკეტების გამოყენებასაც. 2025 წლის თებერვლის მდგომარეობით, 60-ზე მეტ ადამიანს ემუქრება სისხლისსამართლებრივი დევნა პროტესტთან კავშირის გამო.
ანგარიშში საუბარია იძულებით გაუჩინარებაზე, პირადი სივრცის უკანონო ჩხრეკებზე, საჯარო სექტორიდან დისკრიმინაციულ გათავისუფლებებზე და რეპრესიულ საკანონმდებლო ინიციატივებზე.
სამოქალაქო ორგანიზაციები აღნიშნავენ, რომ ხელისუფლება — მათ შორის, სასამართლო და აღმასრულებელი სტრუქტურები — მონაწილეობენ ადამიანის უფლებების სისტემურ დარღვევებში და ხელი უწყობენ დაუსჯელობის სინდრომს.
