ანრი ოხანაშვილი „ნაცმოძრაობას“ - როგორ შეიძლება „ნაცმოძრაობის“ ვინმეს ეშინოდეს, რა გვჭირს თქვენგან გასაქცევი? კეთილი იყოს თქვენი მობრძანება გაყალბებულ პარლამენტში

რა მორალური უფლებით საუბრობთ ამნისტია გინდათ თუ არ გინდათ, ამას თქვენ კი არ გეკითხებათ ვინმე, „ქართული ოცნება" „ნაციონალური მოძრაობის" გარშემო არასდროს არ იტრიალებს, - ასე მიმართა იურიდიულ საკითხთა კომიტეტის თავმჯდომარე ანრი ოხანაშვილმა პარლამენტის საგაზაფხულო სესიის პლენარული სხდომაზე „ნაციონალური მოძრაობის" წარმომადგენლებს.

როგორც ოხანაშვილმა აღნიშნა, „ნაციონალური მოძრაობის" სიტყვებს ფასი არ აქვს და „ეს ადამიანები ჩვენი ქვეყნის ევროპული განვითარების გზას არ აწერენ ხელს".

,,როგორ შეიძლება „ნაციონალური მოძრაობის" ვინმეს ეშინოდეს, მითუმეტეს, „ქართულ ოცნებას"? რა გვჭირს თქვენგან გასაქცევი, ხალხმა გადაწყვიტოს თუ ვინმეს ვინმესი ეშინია და ვინ რა პოზიციებს აფიქსირებს. თქვენ სიტყვებს ფასი არ აქვს, ამბობდით, რომ ფორმალურ თავმჯდომარეს ვერ დაიჭირენო - ხომ დააკავეს სამართლებრივად, ყველა პროცედურების დაცვით? არ მივიღებთ გირაოსო, ამასაც ამბობდით, მაგრამ მიიღეთ, მიგაღებინეს იმიტომ, რომ არ მოგცეს საშუალება დესტრუქციის. გაყალბდა არჩევნებიო - ამბობდით და დღეს აქ ხართ, კეთილი იყოს თქვენი მობრძანება გაყალბებულ პარლამენტში. ვინც მივა პუფი იქნებაო, ამით თქვენივე ფორმალურმა თავმჯდომარემ მოგაყენათ შეურაცხყოფა. რა მორალური უფლებით საუბრობთ ამნისტია გინდათ თუ არ გინდათ, ამას თქვენ კი არ გეკითხებათ ვინმე, „ქართული ოცნება" „ნაციონალური მოძრაობის" გარშემო არასდროს არ იტრიალებს. ჩვენ ვართ ერთგული ევროპული შეთანხმების, სტრატეგიული პარტნიორების ჩართულობით მიღებული დოკუმენტის და ჩვენ ამის ერთგული ვრჩებით. ეს დოკუმენტი არის ჩვენი ქვეყნის ევროპული გზა შემდგომი განვითარებისთვის, რასაც ეს ადამიანები არ აწერენ ხელს. ვის ინტერესებს შეიძლება ემსახურებოდეს ჯგუფი, რომელიც ევროპულ ინტერესებს არ ირჩევს მარტივი გამოსაცნობია. ძალიან დიდი წარმოდგენა გაქვთ ამ ადამიანზე, თუ გგონიათ ნიკა მელიას გარშემო იტრიალებს ვინმე", - აღნიშნა ანრი ოხანაშვილმა.