ქვეყნის ევროპული გზიდან გადახვევის არანაირი საშიშროება არ არსებობს, – ამის შესახებ დედაქალაქის მერმა, კახა კალაძემ ჟურნალისტებს განუცხადა.
როგორც კახა კალაძემ აღნიშნა, ყველაფერი კეთდება, რათა საქართველო გახდეს იმ დიდი ოჯახის წევრი, რასაც ევროპა ჰქვია.
„ჩემთვის, ჩემი თანაგუნდელებისთვის ევროპა, ევროპული ღირებულებები ძალიან მნიშვნელოვანია. ბევრი კარგი პროექტი გვაქვს განხორციელებული, ბევრი მნიშვნელოვანი ნაბიჯია გადადგმული. ქართული პასპორტით ევროკავშირის ქვეყნებში გადაადგილება თავისუფლად არის შესაძლებელი, თუმცა ბევრია კიდევ სამუშაო ამ მიმართულებით. ჩვენ ძალისხმევას არ დავიშურებთ, ყველაფერს გავაკეთებთ, რათა საბოლოოდ ჩვენ გავხდეთ იმ დიდი ოჯახის წევრი, რასაც ევროპა და ევროკავშირი ჰქვია“, – განაცხადა კალაძემ.
საქართველო ომს არ იწყებს, არ ერთვება ომში, მეორე ფრონტი საქართველოში არ გაიხსნება და საქართველო არ უერთდება სანქციებს, – განაცხადა დედაქალაქის მერმა.
მისი თქმით, რომელიმე კომპანია ან პიროვნება თუ სანქცირებულია, მას საქართველოში მოჰყვება შესაბამისი რეაგირება კანონის და კონსტიტუციის ფარგლებში.
„ჩვენ მივესალმებით ტურისტების შემოდინებას, ვერანაირ პრობლემას ვერ ვხედავ. თუ რომელიმე კომპანია, ან პიროვნება სანქცირებულია, რა თქმა უნდა, მას საქართველოში მოჰყვება შესაბამისი რეაგირება კანონის და კონსტიტუციის ფარგლებში. საქართველოში არსებობს კონსტიტუცია, არსებობს კანონი, ნებისმიერი ადამიანი, ეს იქნება საქართველოს მოქალაქე, თუ უცხო ქვეყნის მოქალაქე, თუ დაარღვევს კანონს, მას მოჰყვება ყოველთვის შესაბამისი რეაგირება“, – განაცხადა კალაძემ.
