სახალხო დამცველის არჩევის პროცედურა განისაზღვრება უპირატესად საქართველოს პარლამენტის რეგლამენტით. აუცილებელი იქნება კონსულტაციების პროცესი, გარკვეული შეთანხმების არსებობა კანდიდატურის ირგვლივ. რასაკვირველია, საპარლამენტო პროცედურები მოიცავს სამოქალქო საზოგადოების ჩართულობასაც, – ამის შესახებ საპარლამენტო უმრავლესობის წევრმა, მიხეილ სარჯველაძემ განაცხადა.
მისი თქმით, სამოქალაქო საზოგადოების ჩართულობა არ შეიძლება ანაცვლებდეს რეგლამენტით გათვალისწინებულ წესს.
„მოგეხსენებათ, რომ მოქმედი რეგლამენტის მიხედვით არის გათვალისწინებული თუ ვის აქვს დასახელების უფლება, ასეთად რეგლამენტი მოიხსენიებს საპარლამენტო ფრაქციას და უფრაქციო პარლამენტის წევრთა შვიდკაციან ჯგუფს. შესაბამისად, მათ როგორ ექნებათ კონსულტაციები სამოქალაქო საზოგადოებასთან კანდიდატურის შერჩევასთან დაკავშირებით, როგორი იქნება ეს წესები, რასაკვირველია აქ ვფიქრობთ და მოსალოდნელია, რომ ამ შემთხვევაში ასეთი კონსულტაციები შეიძლება არსებობდეს ცალკეული პოლიტიკური აქტორების მხრიდან. არც ერთ შემთხვევაში სამოქალაქო საზოგადოების ჩართულობა არ შეიძლება ანაცვლებდეს რეგლამენტით გათვალისწინებულ წესს, რაც არის პოლიტიკური პროცესი. პოლიტიკურ პროცესში ვგულისხმობთ, რომ ამ შემთხვევაში პოლიტიკური პარტიების მაღალი კვორუმის არსებობის პირობებში, პოლიტიკური პარტიების შეთანხმებამ უნდა უზრუნველყოს საუკეთესო კანდიდატის შერჩევა“, – განაცხადა სარჯველაძემ.
