„ნაციონალური მოძრაობის“ წევრის ხატია დეკანოიძის განცხადებით, დიდი ალბათობაა, რომ სანქციების ქვეშ მოხვდეს ნებისმიერი ადამიანი, ვინც ხელს უწყობს რუსული გავლენების გაზრდას და ფინანსური კაპიტალით ეხმარება რუსული კაპიტალის გაზრდას.
ამასთან, ხატია დეკანოიძე უკრაინულ ვებგვერდზე – sanctions.nazk.gov.ua გამოქვეყნებულ სიასთან დაკავშირებით განმარტავს, რომ კორუფციის პრევენციის სააგენტოს, ე.წ. ნაზეკას ევალება სანქციებთან დაკავშირებული ღონისძიებები.
ხატია დეკანოიძის თქმით, ბიძინა ივანიშვილი დასანქცირებულია შვეიცარიული ბანკის მიერ და გააკეთებენ ყველაფერს, რომ მის მიმართ სანქციები გაიზარდოს.
„უმრავლესობის წევრებს ვურჩევდი, დაგუგლონ და ნახონ – არსებობს ანტიკორუფციული ბიურო, რომელშიც მოვალეობის შემსრულებელი არის გიზო უგლავა და არის კიდევ მეორე უწყება – კორუფციის პრევენციის სააგენტო, ე.წ. ნაზეკა, რომელმაც ეს სია გამოაქვეყნა. თუ დაგუგლავენ, ნახავენ, რომ სხვადასხვა უწყებებია და სწორედ „ნაზეკას“ ევალება სანქციებთან დაკავშირებული ღონისძიებები. ამიტომ უმრავლესობას ვურჩევდი, დაგუგლონ და თუ არ იციან, იკითხონ მაინც. გავაკეთებთ ყველაფერს, რომ ბიძინა ივანიშვილის თავზე სანქციები გაიზარდოს, ის დასანქცირებულია შვეიცარიული ბანკის მიერ, ეს არის მისი კაპიტალის გადაგდება საეჭვო კალათაში, რაც უკავშირდება იმას, რომ ივანიშვილი არის ოლიგარქი. ახლა მოთხოვნილია მისი სანქცირება უკრაინის მიერ. დარწმუნებული ვარ, ივანიშვილის დასანქცირება იქნება რუსეთის ინტერესების საწინააღმდეგო და უკრაინისა და რეგიონის სასარგებლო. ნებისმიერი ადამიანი, ვინც ხელს უწყობს რუსული გავლენების გაზრდას და ფინანსური კაპიტალით ეხმარება რუსული კაპიტალის გაზრდას, დიდი ალბათობაა, რომ სანქციების ქვეშ მოხვდეს. ამაში გასაკვირი არაფერია და მგონი, არც ივანიშვილს უნდა გაუკვირდეს“, – აღნიშნა ხატია დეკანოიძემ.
