საქართველოს პარლამენტის თავმჯდომარის შალვა პაპუაშვილის განცხადებით, საარჩევნო კოდექსში ცვლილებებს 3 ოქტომბერს იურიდიულ საკითხთა კომიტეტის სხდომაზე განიხილავენ. პაპუაშვილი დეპუტატებს მოუწოდებს, მოემზადონ აღნიშნული სხდომისთვის და მიიღონ მონაწილეობა პროცესში.
შალვა პაპუაშვილის თქმით, მომავალ კვირას უკვე პლენარულ სხდომაზე პირველი მოსმენით მიღების შემთხვევაში, პროექტი შესაფასებლად ვენეციის კომისიას და ეუთო/ოდირს გადაეგზავნება. შალვა პაპუაშვილის განმარტებით, ცვლილებების მესამე მოსმენით მიღების სავარაუდო თარიღად კი 29 ნოემბერია განსაზღვრული.
„რაც შეეხება საარჩევნო კოდექსში ცვლილებას, 29 ნოემბერი გვაქვს სავარაუდო თარიღად აღებული, როდესაც მესამე მოსმენით უნდა მოხდეს ცვლილების მიღება. ჩვენ თუ მომავალ კვირას პლენარულ სხდომაზე განვიხილავთ და პირველი მოსმენით მივიღებთ კანონს, ამის შემდეგ გადაეგზავნება ვენეციის კომისიას, ეუთო/ოდირს დასკვნისთვის და ამ გრაფიკით, დიდი ალბათობით, ვენეციის კომისია, ეუთო/ოდირიც შეძლებენ, დროულად მოგვაწოდონ თავიანთი პასუხი, რათა ნოემბრის ბოლოს შევძლოთ უკვე მეორე-მესამე მოსმენით კანონის მიღება.
ჯერჯერობით პროცესი მიდის ძალიან კარგად. ამისთვის, უპირველეს ყოვლისა, მადლობა სამუშაო ჯგუფის ხელმძღვანელ ბატონ გივი მიქანაძეს, რომელმაც ეს პროცესი ძალიან გახსნილად, გამჭვირვალედ და ინკლუზიურად წაიყვანა. შესაბამისად, გვაქვს მნიშვნელოვანი იდეები, რომელიც შემუშავდა ამ პროექტის ფარგლებში და რთულიც არის, რაიმე დიდი წუნი მოეძებნოს. ვნახოთ, განხილვები იქნება. ამიტომ კიდევ ერთხელ საჯაროდაც მინდა, მოვუწოდო ყველას, ვისაც სურს, რომ ამ პროცესში იყოს ჩართული, როგორც კომიტეტის თავმჯდომარემ მოგვახსენა, ორშაბათს იქნება დღის მეორე ნახევარში კომიტეტის სხდომა, ამიტომ მოემზადოს ყველა ამ სხდომისთვის და შესაბამისად, მიიღოს მონაწილეობა ამ პროცესში“, – განაცხადა შალვა პაპუაშვილმა პარლამენტის ბიუროს დღევანდელ სხდომაზე.
