ბულგარეთის მთავრობა აცხადებს, რომ სატვირთო მანქანა, რომელიც რუსეთის გამოძიების ცნობით, ყირიმის ხიდის აფეთქების საქმეში ფიგურირებს, ბულგარეთში არასდროს ყოფილა. შესაბამის ინფორმაციას ბულგარული სააგენტო BGNEWS ავრცელებს.
„სარწმუნოდ დამტკიცებულია, რომ ყირიმის ხიდზე აფეთქებული სატვირთო მანქანა არასდროს ყოფილა ბულგარეთის რესპუბლიკის ტერიტორიაზე, რომელიც მითითებულია მისი მარშრუტის საწყის წერტილად“, – განაცხადეს ბულგარეთის მთავრობის პრესსამსახურში.
განცხადების თანახმად, ბულგარეთის მთავრობა არავითარ შემთხვევაში არ დაუშვებს, რომ მისი ქვეყნის სახელი ასოცირებული იყოს ტერორისტულ საქმიანობასთან რამე სახის კავშირთან.
რუსული მედიის ცნობით, 8 ოქტომბერს აფეთქებული სატვირთო მანქანით პოლიეთილენის ტრანსპორტირება ხორციელდებოდა.
ბულგარული სამსახურების შემოწმებამ დაადგინა, რომ ანალოგიური მახასიათებლის საქონელი ბულგარეთის ტერიტორიაზე ევროკავშირის წევრი ქვეყნიდან კონტეინერით შევიდა ტრანზიტის რეჟიმით შესაბამისად გაფორმებული დოკუმენტებით. ბულგარეთში აღნიშნული საქონლის ყოფნის პერიოდში ის იმყოფებოდა საბაჟო კონტროლის ქვეშ და ქვეყანა იმავე კონტეინერით ბურგასის პორტიდან 17 სექტემბერს დატოვა სხვა ქვეყნის მიმართულებით, რუსეთის გარდა. შემოწმებამ მკაფიოდ აჩვენა, რომ ის კონტეინერი, რომლითაც საქონელი ბულგარეთიდან გავიდა, აფეთქებულ სატვირთო მანქანაში არ ყოფილა. საქმესთან დაკავშირებული მთელი ინფორმაცია გადაეცა პროკურატურას.
