ჩვენ ამ ღია პროცესით, მზად ვართ, რომ ოპოზიციასთან სახალხო დამცველობის კანდიდატებთან დაკავშირებით ვიმსჯელოთ, მათ დადებით და უარყოფით მხარეებზე ვისაუბროთ და ამ მხრივ შევთანხმდეთ, - ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან საუბრისას განაცხადა.
მისივე თქმით, დამოკიდებულება, რომ საპარლამენტო უმრავლესობამ ოპოზიციის „ფავორიტ“ სახალხო დამცველობის კანდიდატს უნდა დაუჭიროს მხარი, დემოკრატიას ეწინააღმდეგება.
„როგორც ჩანს ჯერ კიდევ არ არის ბოლომდე გაქარწყლებული დამოკიდებულება და არის წარმოდგენა, თითქოს სახალხო დამცველი ისე უნდა იყოს არჩეული, რომ ოპოზიციის რომელიღაცა ნაწილმა უნდა თქვას, ვინ არის მისი ფავორიტი და შემდეგ უმრავლესობა იძულებული უნდა იყოს, დაეთანხმოს ოპოზიციის ფავორიტს. ეს ასე არ არის. ეს პირიქით დემოკრატიას ეწინააღმდეგება.
„ქართული ოცნება“ არის საპარლამენტო უმრავლესობა, შესაბამისად, საქართველოს მოსახლეობის უმრავლესობას წარმოადგენს და ამიტომ უპირველეს ყოვლისა, გასათვალისწინებელი უნდა იყოს ჩვენი ქვეყნის მოსახლეობის უმრავლესობის აზრი. ეს არის დემოკრატია. ამიტომ ჩვენ ეს პროცესი ასე წავიყვანეთ - იყო ღია პროცესი და მონაწილეობის მიღება ყველას შეეძლო. საზოგადოებამ ყველა ამ კანდიდატის სუსტი თუ ძლიერი მხარეები იხილა და ახლა არის პოლიტიკური შეთანხმების საკითხი,“ - განაცხადა პაპუაშვილმა.
შალვა პაპუაშვილი - ჩვენ ამ ღია პროცესით, მზად ვართ, რომ ოპოზიციასთან სახალხო დამცველობის კანდიდატებთან დაკავშირებით ვიმსჯელოთ
ნახვები: 452
