ოპოზიციაშიც კარგად ხედავენ, რომ „ნაციონალური მოძრაობა" არის ძალა, რომლის ხელისუფლებაში ყოფნა დაუშვებელია, - ამის შესახებ საპარლამენტო უმრავლესობის წევრმა მიხეილ სარჯველაძემ განაცხადა.
აღნიშნული კომენტარით ის პარტია „ლელო საქართველოსთვის" ლიდერის მამუკა ხაზარაძის განცხადებას გამოეხმაურა.
„საერთოდ გაშარჟება არ მიყვარს, მაგრამ ოპოზიციის მხრიდან ეს ინიციატივა რაღაცნაირად სახლობანას თამაშს ჰგავს. დამოკიდებულება და ღირებულების სისტემაში ნიშანწყალი იმის, რომ ოპოზიციას რაღაც რეალობის აღქმა მაინც აქვს, ეს ნამდვილად არის, ვინაიდან ისინიც კარგად ხედავენ, რომ „ნაციონალური მოძრაობა" არის ძალა, რომლის ხელისუფლებაში მოსვლა და ყოფნა, საერთოდ დაუშვებელი და არანორმალურია. ეს არ ეხება მხოლოდ ძალოვან სამინისტროებს. ამას არ ეყოფა ის ბოდიში, რომელიც „ნაციონალურმა მიძრაობამ" მოიხადა. მათ უნდა იტვირთონ პასუხისმგებლობა, რათა არასდროს ჰქონდეთ შესაძლებლობა, გაიმეორონ ის, რაც დაატრიალეს ქვეყანაში 2003 წლიდან ლამის 2012 წლის მთლიანად ჩათვლით. ეს იყო კატასტროფა ქართველი ერისთვის, ვინაიდან აბსოლუტურად ფეხქვეშ იყო გათელილი ადამიანის ყოველგვარი უფლება, რაც წარმოუდგენელი რამაა", - განაცხადა მიხეილ სარჯველაძემ.
ამასთან, სარჯველაძე კითხვაზე საპასუხოდ აღნიშნავს, რომ სკეპტიკურად უყურებს ოპოზიციის გაერთიანების შანსებს, თუნდაც ჩრდილოვანი მთავრობის დაკომპლექტების საკითხში.
„მე ამ შანსებს სკეპტიკურად შევხედავდი. ამაზე თეორიულად მსჯელობას აზრი არ აქვს. პრაქტიკული თვალსაზრისით მე ეს დიდად პერსპექტიული ამბავი არ მგონია", - განაცხადა მიხეილ სარჯველაძემ.
პარტია „ლელო საქართველოსთვის" ლიდერის მამუკა ხაზარაძის განცხადებით, არსებული ვითარებიდან გამომდინარე, ოპოზიციურმა ძალებმა უნდა გადადგან ქმედითი ნაბიჯები კოალიციის შესაქმნელად და საჭიროა, დაიწყოს კონსულტაციები ჩრდილოვანი კოალიციური მთავრობის ფორმირებაზე, ასევე პრემიერობის კანდიდატზე.
თუმცა, მისივე თქმით, დღესვე უნდა შეთანხმდნენ, რომ „ნაციონალური მოძრაობის" მხრიდან ძალოვანი მინისტრები არ იქნებიან წარდგენილი მომავალ მთავრობაში.
