საქართველოს მესამე პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლო პროცესი, თბილისის საქალაქო სასამართლოში 6 თებერვალს, 17:00 საათზე გაიმართება.
ბოლო სხდომაზე, რომელიც სამ თებერვალს გაიმართა, სასამართლო პროცესზე 3 მოწმე დაიკითხა, მათ შორის, კლინიკა „ვივამედის“ გენერალური დირექტორი ნინო ნადირაძე, სამხარაულის ექსპერტიზის ბიუროს ექსპერტი, ეკა ჩავლეიშვილი და სამხარაულის ექსპერტი, აკაკი ტყემალაძე.
სპეციალურმა პენიტენციურმა სამსახურმა სასამართლოს დასაკითხ მოწმეთა სიაში არსებული რამდენიმე პირის ჩახსნის შუამდგომლობით მიმართა.
როგორც სპეციალური პენიტენციური სამსახურის წარმომადგენელმა აღნიშნა, მათ მოწმეების დაკითხვა დაასრულეს.
„განცხადებით მივმართავთ სასამართლოს. როგორც მოგეხსენებათ, ჩვენ დასაკითხად გვყავდა არასამედიცინო განათლების პირებიც. ყველა ეს არასამედიცინო განათლების პირი გვინდა ჩავხსნათ.
ვფიქრობთ, სასამართლოს სრულყოფილი ინფორმაცია მიეწოდა როგორც სამედიცინო თვალსაზრისით, ასევე არასამედიცინო თვალსაზრისით. წარმოდგენილია პირადი საქმე, შესაბამისი დოკუმენტაცია, როგორც ექსპერტიზის დასკვნები და მისი დანართები, ამიტომ ჩვენ ვშუამდგომლობთ, აღარ დაიკითხოს ჩვენ მიერ მოთხოვნილი, არც ერთი მოწმე. ჩვენ დავასრულეთ მოწმეების დაკითხვა“, - განაცხადა პენიტენციური სამსახურის წარმომადგენელმა ნიკა აბრამიშვილმა.
მესამე პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით, საქმის მოსამართლის გიორგი არევაძის განცხადებით, შემდეგ სხდომაზე მხარეები დასკვნითი სიტყვით წარდგებიან.
ცნობისთვის, საქართველოს ყოფილი პრეზიდენტისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლოს შუამდგომლობით სააკაშვილის ადვოკატებმა მიმართეს. აღნიშნულ შუამდგომლობას მოსამართლე გიორგი არევაძე განიხილავს.
