ის, რომ ქვეყანაში იყო მძიმე პრობლემები, ხარვეზები, მათ შორის გარკვეულ ადამიანებს ჰქონდათ გადაცდომა, ეს ვერანაირად ვერ იქნება კავშირში მიხეილ სააკაშვილთან, – ამის შესახებ „ნაციონალური მოძრაობის“ წევრმა, ირაკლი ნადირაძემ განაცხადა.
ნადირაძის თქმით, სააკაშვილი არის პუტინის პირადი პატიმარი და რუსი ოლიგარქის ხელით ხდება მასზე პირადი ვენდეტა.
„მიუხედავად იმისა, რომ „ქართული ოცნების“ პროპაგანდა ცდილობს, ევროპარლამენტის რეზოლუცია და სტრასბურგის გადაწყვეტილება ერთმანეთთან დააკავშიროს, ეს ასე არ არის და ვერ იქნება, რადგან დიახ, ქვეყანაში იყო გარკვეული ტიპის პრობლემები, მათ შორის მძიმე პრობლემები. იყო მთელი რიგი მძიმე გადაცდომები და დანაშაულებებიც, მაგრამ „ქართულმა ოცნებამ“ ერთ-ერთი მთავარი დამნაშავე ბედუკაძე გმირად გამოგვიცხადა. იმის ნაცვლად, რომ ყოფილიყო ბრალდებულების სკამზე, განსასჯელის ადგილას, თავისუფლად გადააადგილდება და ღიად, დაუფარავად რუსეთუმე ძალებთან ერთად ლობირებს. ფაქტობრივად, რუსეთთან მიერთებას. ამიტომ ის, რომ იყო რაღაც ხარვეზები, მათ შორის დანაშაულებები და გარკვეულ ადამიანებს ჰქონდათ გადაცდომა, ეს არანაირად და ვერანაირად ვერ იქნება კავშირში მიხეილ სააკაშვილთან, რადგან მიხეილ სააკაშვილი არის პუტინის პირადი პატიმარი და რუსი ოლიგარქის ხელით ხდება მასზე პირადი ვენდეტა“, – განაცხადა ირაკლი ნადირაძემ.
