„ნაციონალური მოძრაობის" კანდიდატების წარდგენა არის ლოგიკური დასასრული იმ პროცესისა, რომელსაც ისინი წარმართავდნენ მთელი ამ თვეების განმავლობაში, - ამის შესახებ პარლამენტის საპროცედურო საკითხთა კომიტეტის თავმჯდომარის მოადგილე გურამ მაჭარაშვილმა განაცხადა.
მისივე თქმით, წინასაარჩევნო კამპანია მიმართული უნდა იყოს საზოგადოებასთან ურთიერთობაზე, მათ გამოწვევებზე.
„ჩვენ ვამბობდით, რომ აუცილებელი იყი ოპოზიციის დღის წესრიგი შეცვლილიყო, რადგან წინასაარჩევნო კამპანია უნდა იყოს მიმართული საზოგადოებასთან ურთიერთობაზე, მათ გამოწვევებზე და ასე შემდეგ. სამწუხაროდ, მათ აირჩიეს სხვა გზა, დესტრუქციის გზა და აქედან გამომდინარე, ვერ მოძებნეს კანდიდატები, გარდა საკუთარი ოჯახის წევრებისა და იმ ადამიანებისა, ვინც ისედაც იყვნენ ჩართული ამ დესტრუქციაში. ეს არის ოპოზიციის შეთავაზება საზოგადოების მიმართ.
სურათი არის ძალიან მარტივი, არჩევანი აქვს გასაკეთებელი საზოგადოებას კონსტრუქციასა და დესტრუქციას შორის, მშვიდობასა და სამხედრო კონფლიქტებს შორის, პროგრესსა და რეგრესს შორის, ქვეყნის ღირებულებების დაცვასა და მის უგულებელყოფას შორის. ეს გაგრძელდება იქამდე, ვიდრე „ნაციონალური მოძრაობა" იქნება ოპოზიციაში მთავარი ოპოზიციური ძალა და საზოგადოება არ ჩაანაცვლებს „ნაციონალურ მოძრაობას" სხვა პოლიტიკური ძალებით. დარწმუნებული ვარ, ეს არჩევნები იქნება გარდამტეხი, როცა საზოგადოება მიხვდება, რომ აუცილებელია პოლიტიკური ოპონენტი ჰყავდეს ხელისუფლებას, რომელიც ჯანსაღად კრიტიკულად მიუდგება პროცესებს, გააკრიტიკებს ხელისუფლებას და ამის შემდგომ ეს პოლიტიკური ძალა მოვა ხელისუფლებაში, როცა საზოგადოება გადაწყვეტს. მანამდე ბუნებრივად ვერ მოხდება ვერანაირი კონკურენცია „ქართულ ოცნებასთან". ჩვენ ეს დავინახეთ, ამას ვხედავ.
დღეს საზოგადოებას ოპოზიციამ ვერაფერი შესთავაზა, გარდა იმისა, რომ წარსული გაახსენა. ნაცვლად იმისა, რომ ახალი კანდიდატები მოეძებნა, დეპუტატები, ოჯახის წევრები დაასახელა. ეს ნიშნავს, რომ ამოწურულია უკვე მათი რესურსი. ჩვენ ნამდვილად გვინდა, რომ ოპოზიციაში იყოს ჯანსაღი ძალები, რომელიც ჩვენ გაგვაკრიტიკებს ჯანსაღად და ბუნებრივია, ნებისმიერი ხელისუფლება ოდესმე მიდის ხელისუფლებისგან, მაგრამ მიდის იმ შემთხვევაში, როდესაც საზოგადოება ხედავს, რომ მასზე უკეთესი პოლიტიკური ძალა უკვე არსებობს, დღეს ეს ჩვენ არ გვაქვს", - განაცხადა გურამ მაჭარაშვილმა.
