მოსკოვის საპატრიარქოს უკრაინული მართლმადიდებელი ეკლესიის ყველა ბერმა და მსახურმა მარტის ბოლოსთვის კიევ-პეჩერის ლავრის ყველა დაწესებულება უნდა დატოვოს. ამის შესახებ ნათქვამია უკრაინის კულტურისა და საინფორმაციო პოლიტიკის მინისტრის, ალექსანდრე ტკაჩენკოს განცხადებაში, რომელსაც უკრაინული მედია ავრცელებს.
განცხადების თანახმად, უკრაინული მართლამდიდებელი ეკლესიის მიერ კიევ-პეჩერის ლავრის უსასყიდლოდ გამოყენების შეთანხმება 2023 წლის 29 მარტიდან უქმდება. ეს გადაწყვეტილება ეფუძნება უწყებათაშორისი სამუშაო ჯგუფის დასკვნებს, რომლითაც დგინდება, რომ მონასტრის მიერ დარღვეულია სახელმწიფო ქონების გამოყენების შეთანხმების პირობები.
მოსკოვის საპატრიარქოს უკრაინული მართლმადიდებელი ეკლესია ლავრის შენობებს 2013 წლის იჯარის შეთანხმების საფუძველზე იყენებს. ეკლესიის წარმომადგენლები აცხადებენ, რომ კიევის პეჩორის ლავრადან მამათა მონასტრის გაძევების იურიდიული საფუძვლები არ არსებობს და ეს არის კულტურის სამინისტროს მაღალჩინოსნების თვითნებური სურვილი.
აღსანიშნავია, რომ 2022 წლის დეკემბერში უკრაინის პრეზიდენტმა განაცხადა, რომ ეროვნული უსაფრთხოებისა და თავდაცვის საბჭომ დაავალა მინისტრთა კაბინეტს, შეიმუშაოს ინიციატივა უკრაინაში მოსკოვის საპატრიარქოს უკრაინული მართლმადიდებელი ეკლესიის საქმიანობის აკრძალვის შესახებ.
