ევროპარლამენტარი როდესაც ესწრება რომელიმე პარტიის აქციას, ეს უკვე არის მიუღებელი და კიდევ ერთხელ აჩვენებს მის დამოკიდებულებას ქართული სახელმწიფოს მიმართ, – ამის შესახებ ჟურნალისტებს პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ განუცხადა.
ირაკლი კობახიძეს კითხვა დაუსვეს ევროპარლამენტარ ვიოლა ფონ კრამონის მისვლის შესახებ გუშინ მთავრობის ადმინისტრაციასთან გამართულ აქციაზე, რაზეც საპალამენტო უმრავლესობის ლიდერმა განაცხადა, რომ აქციაზე მისვლა ევროპარლამენტარის მხრიდან საქართველოს სახელმწიფოს მიმართ უდიერ დამოკიდებულებაზე მეტყველებს.
„ჩვენ ვიცით ვიოლა ფონ კრამონის დამოკიდებულება ქართული სახელმწიფოს მიმართ. ეს არის, სამწუხაროდ, ერთგვარი უდიერი დამოკიდებულება და ამის გამოვლინება იყო გუშინ მისი მისვლა იმ აქციაზე, რომელიც გამართა ერთ-ერთმა პოლიტიკურმა პარტიამ. როდესაც ევროპარლამენტარი ესწრება რომელიმე პოლიტიკური პარტიის საპროტესტო აქციას, ეს უკვე თავისთავად არის მიუღებელი და კიდევ ერთხელ აჩვენებს მის დამოკიდებულებას ქართული სახელმწიფოს მიმართ, ეს დამოკიდებულება, უბრალოდ, არ არის სწორი“, – განაცხადა ირაკლი კობახიძემ.
