სუს-ის საიდუმლო კრებსების საქმეზე შესაძლოა, ყოფილი პრემიერის, გიორგი გახარიას თანაგუნდელები - ალექსანდრე ხოჯევანიშვილი და კახა საბანაძე დააკავონ. მოვლენების ამ სცენარით განვითარებას თავად გახარიას გუნდში არ გამორიცხავენ.
შეგახსენებთ: თემაზე საუბრისას პრემიერმა ირაკლი ღარიბაშვილმა თქვა, გამოძიება ყველა ვერსიაზე მუშაობს, მათ შორის, გახარიას გუნდის წევრების ჩართულობის კუთხითაც.
„ჩვენ არაერთხელ აღვნიშნეთ, რომ პოლიტიკურ პასუხისმგებლობას ვიღებთ "ოცნების" მმართველობის დროს მიღწეულ, როგორც წარმატებაზე, ასევე, წარუმატებლობაზეც და "ოცნების" დღევანდელი ლიდერებისგან განსხვავებით იმაზეც, რომ მანდატის ფარგლებში, თუნდაც რეფორმების კუთხით, ვერ შევქმენით საკმარისი ფუნდამენტი, რომ ამგვარი მეთოდებით, პოლიტიკურ ანგარიშსწორებას, უმსგავსობას ერთხელ და სამუდამოდ მოღებოდა ბოლო. თუმცა ის, რასაც დღეს ვისმენთ და ვხედავთ, წარმოუდგენელია და მიუღებელია. ამის ჩამდენმა პირებმა, კანონის სრული სიმკაცრით უნდა აგონ პასუხი. ამასთან აღვნიშნავთ, რომ ინფორმაცია, ამ მასალების არსებობის შესახებ "ოცნების" ლიდერებმა ირიბად დაადასტურეს", - ამბობს ბექა ლილუაშვილი.
ამასთან, გახარიას გუნდის წევრები საკითხთან დაკავშირებით პარლამენტში საგამოძიებო კომისიის შექმნას მოითხოვენ, რომელშიც სახალხო დამცველი და უცხოელი ექსპერტები იქნებიან ჩართული.
