"ლელოს" გენერალური მდივანი ირაკლი კუპრაძე ფრანკლინის კლუბის ღონისძიებაზე მოძალადეების მისვლას ეხმიანება და ამბობს, რომ ისინი "ქართული ოცნების" დავალებას ასრულებენ.
ოპოზიციონერი პოლიტიკოსის თქმით, ახალგაზრდებზე, რომლებიც ქვეყნის განვითარებასა და დემოკრატიაზე მსჯელობენ, ხელისუფლებას ძალადობის ნებართვა აქვს გაცემული.
"დგანან ადამიანები, რომლებსაც აქვთ სრულიად გარკვეული დავალება „ქართული ოცნების" მხრიდან - იყვნენ „ტიტუშკები“ „ქართული ოცნების“ ხელში. დაშვებაა გაკეთებული, რომ „კი, მიდი, ჩაიდინე დანაშაული, მიდი, ესროლე ქვა ახალგაზრდებს, რომლებიც რაზე საუბრობენ? ამ ქვეყნის განვითარებაზე, სიყვარულზე, დემოკრატიაზე, ადამიანის უფლებებზე. ამას პასუხი აქვს ძალიან ნათელი. ამიტომაც ვარ დღეს აქ ჩემს მეგობრებთან ერთად. დარწმუნებული ვარ, რომ დავინახავთ ბევრ საინტერესო ახალგაზრდას, რომელსაც არაფრის ეშინია. გარეთ იდგნენ და იყაყანონ. მინდა გავახსენო ირაკლი ღარიბაშვილს, რომ მისი შვილი ფრანკლინის სახელობის უნივერსიტეტში სწავლობს ამერიკაში. ამიტომ ეს ხალხი არის სასაცილო თავიდან ბოლომდე, - ამბობს კუპრაძე.
