„აქვს საკმაოდ დამაკმაყოფილებელი მდგომარეობა და ამ ეტაპისთვის კლინიკაში გადაყვანას არ საჭიროებს", - განაცხადა დღეს, 21 ოქტომბერს, ჯანდაცვის მინისტრმა, ეკატერინე ტიკარაძემ მიხეილ სააკაშვილის ჯანმრთელობის მდგომარეობაზე საუბრისას.
ცნობისთვის: მიხეილ სააკაშვილი 21 დღეა, შიმშილობს.
მინისტრის თქმით, პენიტენციური დაწესებულებისგან პაციენტი უზრუნველყოფილია მედიკამენტოზური დახმარებით, რომელსაც ამ ეტაპისთვის საჭიროებს.
„პაციენტის მდგომარეობა ამ ეტაპისთვის სტაბილურია. თქვენ იცით, რომ მე ვეწინააღმდეგები პაციენტის ინფორმაციის გაცემას, ვინაიდან ეს ეთიკის ნორმებს არ შეესაბამება. მას აქვს საკმაოდ დამაკმაყოფილებელი მდგომარეობა. ამ ეტაპისთვის ის კლინიკაში გადაყვანას არ საჭიროებს, თუმცა, პენიტენციური სამსახურის სამედიცინო პერსონალის მხრიდან უზრუნველყოფილია ყველა ის საჭირო ინსტრუმენტული კვლევა და მედიკამენტოზური დახმარება, რომელსაც პაციენტი ამ ეტაპისთვის საჭიროებს", - განაცხადა ტიკარაძემ.
