„ელენე ხოშტარია არის ახალგაზრდა ქალი, ოთხი შვილის დედა და შიმშილობის აქცია არ არის მარტივი", - განაცხადა დღეს, 4 ნოემბერს, „ნაციონალური მოძრაობის" წევრმა, ეკა ხერხეულიძემ.
შეგახსენებთ: „დროას" ლიდერმა, ელენე ხოშტარიამ გუშინ, 3 ნოემბერს, პარლამენტის შენობაში შიმშილობა დაიწყო და მხოლოდ წყალს იღებს. ხოშტარია შიმშილობას მანამდე აპირებს, ვიდრე მიხეილ სააკაშვილს სამოქალაქო კლინიკაში არ გადაიყვანენ.
„ეს არის რისკებით სავსე გზა. ელენე ხოშტარია არის ახალგაზრდა ქალი, ოთხი შვილის დედა და შიმშილობის აქცია არ არის მარტივი. გვესმის, რასთან გვაქვს საქმე. შიმშილობა არ იქნება იოლი ხვალ და ზეგ, მომდევნო დღეები გართულდება. ძალიან არ მინდა, რომ რაიმე ისეთივე სახიფათო რისკების წინაშე აღმოვჩნდეთ, როგორის წინაშეც დადგა მიხეილ სააკაშვილი. არადა, მოთხოვნა ყველა ნორმალურ ქვეყანაში ადვილად გადასაწყვეტია", - განაცხადა ხერხეულიძემ.
ცნობისთვის: საქართველოს მესამე პრეზიდენტი, მიხეილ სააკაშვილი 1-ელ ოქტომბერს დააკავეს და 34-ე დღეა, შიმშილობს.
