რუსეთთან დაკავშირებით „ქართული ოცნების“ რიტორიკაა, რომ თუ ცხვარი მგელთან მარტო დარჩება, მგელი კეთილ ნებას გამოიჩენს და ცხვარი გადარჩება, - ამის შესახებ „სტრატეგია აღმაშენებლის“ დეპუტატმა პაატა მანჯგალაძემ განაცხადა.
მისი თქმით, „ქართული ოცნებას“ რუსეთის ქმედებებზე რეაგირება არ აქვს.
„რუსეთი რეგიონში სუსტდება და გავლენას კარგავს, ყარაბაღიც ამის გამოვლინებაა, ასევე ის, რომ სომხეთმა დასავლეთისკენ სვლა დაიწყო, უკრაინაში მარცხდება, შავი ზღვის ფლოტი გამოიქცა სევასტოპოლიდან და მოჰყავთ ოჩამჩირეში. ეს ხომ ღია ანექსიაა?! რა დაალაგეს რუსეთთან?! ოჩამჩირეში რომ ბაზა გადმოაქვთ, ეგ არის დალაგებული? „ქართული ოცნების“ რიტორიკაა - თუ ცხვარი მგელთან მარტო დარჩება, ეუბნებიან, რომ მგელი კეთილ ნებას გამოიჩენს და ცხვარი გადარჩება, ჩვენ ვამბობთ, რომ ამას ნაგაზები, მწყემსი სჭირდება, ამერიკა, ნატო სჭირდება, მაგრამ „ქართული ოცნება“ ყველას ეძახის მტერს და რუსეთი ყოფილა თურმე კეთილი მეზობელი“, - განაცხადა მანჯგალაძემ.
