„თქვენი პრობლემა სწორედ ამაშია, რომ თქვენ არასდროს გინდათ, მიუხედავად იმისა, ჭეშმარიტება რომელ მხარეს არის, რომ მიჰყვეთ ხელისუფლებას და დაუჯეროთ ხელისუფლებას," - განაცხადა დღეს, 9 ნოემბერს, ადამიანის უფლებათა დაცვის კომიტეტის თავმჯდომარე მიხეილ სარჯველაძემ მიხეილ სააკაშვილის გლდანის ციხის საავადმყოფოში იძულებით გადაყვანაზე საუბრისას.
შეგახსენებთ: საქართველოს მესამე პრეზიდენტი გუშინ, 8 ნოემბერს, რუსთავის 12-ე დაწესებულებიდან გლდანის ციხეში გადაიყვანეს, სადაც, სააკაშვილის თქმით, სასწრაფოს მანქანიდან გადმოყვანისას მიწაზე ათრიეს.
"სახალხო დამცველი შეესწრო ამას? სახალხო დამცველს უამბო სააკაშვილმა, სავარაუდოდ, ამის ნაამბობს გადმოცემაზე გვაქვს საუბარი ეს ხომ არ ნიშნავს იმას, რომ ეს არის უდავო ჭეშმარიტება? თქვენი პრობლემა სწორედ ამაშია, რომ თქვენ არასდროს გინდათ, მიუხედავად იმისა, ჭეშმარიტება რომელ მხარეს არის, რომ მიჰყვეთ ხელისუფლებას და დაუჯეროთ ხელისუფლებას. მაშინაც კი, როდესაც ხელისუფლება მართალია. მე ვერ გეტყვით, რატომ მოიტყუება, ეს არ არის ჩემი შესაფასებელი.
თქვენ აბსოლუტურად უაპელაციოდ და უკრიტიკოდ ხართ განწყობილი იმ განცხადების მიმართ, რომელიც მოგაწოდათ ამ შემთხვევაში სააკაშვილმა. ამაშია პრობლემა. ამასთან დაკავშირებით მეტი სიცხადე გვექნება. თქვენ არ გინდათ, რომ მეტი სიცხადე გქონდეთ და გინდათ, რომ იყოთ ამ განცხადების ტყვეობაში", - ამბობს სარჯველაძე.
