საქართველოს ეროვნული ბანკის ინფორმაციით, კომერციული ბანკების მიერ გაცემული სესხების მოცულობა 2023 წლის ოქტომბერში, წინა თვესთან შედარებით, 953.05 მლნ ლარით, ანუ 1.94%-ით გაიზარდა და ოქტომბრის ბოლოს 50.12 მლრდ ლარი შეადგინა.
ეროვნული ბანკის ცნობით, ამავე პერიოდში ეროვნული ვალუტით გაცემული სესხების მოცულობა – 431.98 მლნ ლარით, ანუ 1.60%-ით, ხოლო უცხოური ვალუტით გაცემული სესხების მოცულობა 521.07 მლნ ლარით, ანუ 2.36%-ით გაიზარდა.
ამასთან, ეროვნული ბანკის მონაცემებით, რეზიდენტი იურიდიული პირებისათვის 2023 წლის ოქტომბრის ბოლოს კომერციულ ბანკებს ეროვნული ვალუტით გაცემული ჰქონდათ 8.21 მლრდ ლარის მოცულობის სესხი, რაც, წინა თვესთან შედარებით, 2.51%-ით მეტია, ხოლო უცხოური ვალუტით – 14.04 მლრდ ლარის მოცულობის სესხი, რაც წინა თვის მაჩვენებელს 1.43%-ით აღემატება.
მათივე ანგარიშის მიხედვით, 2023 წლის ოქტომბრის განმავლობაში 1.06%-ით, ანუ 275.01 მლნ ლარით გაიზარდა რეზიდენტი შინამეურნეობების სექტორის დაკრედიტების მოცულობა და ოქტომბრის ბოლოსათვის 26.12 მლრდ ლარი შეადგინა. 2023 წლის ოქტომბრის ბოლოსათვის მთლიანი სესხების ლარიზაციის კოეფიციენტმა 54.82 პროცენტი შეადგინა და, წინა თვის ბოლო მდგომარეობასთან შედარებით, 0.18 პროცენტული პუნქტით შემცირდა.
