„ეკატერინე ტიკარაძე რჩება პოლიტსაბჭოში, რაც პირდაპირ იმის საწინააღმდეგოდ მეტყველებს, რომ რაიმე ტიპის მწვავე დაპირისპირება იყო - აზრთა სხვადასხვაობა ყოველთვის არის", - განაცხადა დღეს, 14 დეკემბერს „ქართული ოცნების" თავმჯდომარე ირაკლი კობახიძემ ეკატერინე ტიკარაძეზე საუბრისას.
შეგახსენებთ: ეკატერინე ტიკარაძემ ჯანდაცვის მინისტრის პოსტი 9 დეკემბერს დატოვა, თუმცა მინისტრის მოვალეობას წლის ბოლომდე შეასრულებს.
„მინისტრის დანიშვნა არის პრემიერის პრეროგატივა. პრემიერს აქვს ასევე საშუალება, რომ კონსულტაციები სთხოვოს გუნდს და ეს კონსულტაციები გაიმართება ისევე, როგორც იმართება ყველა მინისტრის შერჩევის პროცესში. აქედან გამომდინარე, თუ დასჭირდება ვინმეს კონსულტაცია, ყველა იქნება ამაში ჩართული. შესაბამისად, პრემიერის პრეროგატივაა დასახელება და ის დაასახელებს. ეკატერინე ტიკარაძემ თავად გააკეთა განმარტება და ჩვენ უნდა გავყვეთ იმ განმარტებას რაც გააკეთა. ის არის პოლიტსაბჭოს წევრი და პოლიტსაბჭოს წევრად დარჩება. დაპირისპირება რომ ყოფილიყო, ის სავარაუდოდ, არ დარჩებოდა პოლიტსაბჭოში, მაგრამ ის რჩება გუნდის წევრად, რჩება პოლიტსაბჭოში, რაც პირდაპირ იმის საწინააღმდეგოდ მეტყველებს, რომ რაიმე ტიპის მწვავე დაპირისპირება იყო. აზრთა სხვადასხვაობა ყოველთვის არის, თუ რაიმეს განმარტება სურს მინისტრს, ის თავად განმარტავს", - განაცხადა კობახიძემ.
