შსს-ს წარმომადგენლის განცხადებით, ვაზისუბანში მე-15 კორპუსის პირველ სართულზე ბუნებრივი აირის დაგროვების შედეგად მომხდარი აფეთქებისას, დაშავებული ოთხი პირიდან, ერთმა დამწვრობა, ხოლო სამმა მსუბუქი ინტოქსიკაცია მიიღო. როგორც ადგილზე მედიას შსს-ს წარმომადგენელმა განუცხადა, ტარდება შესაბამისი ღონისძიებები.
„ვაზისუბნის დასახლებაში, მე-15 კორპუსში პირველ სართულზე ბუნებრივი აირის დაგროვების შედეგად მოხდა აფეთქება, რამაც გამოიწვია ხანძარი. შემთხვევის ადგილზე ოპერატიულად გამოცხადდნენ სახანზრო - სამაშველო ჯგუფები.
ამ დროისთვის ხანძარი სრულად ლიკვიდირებულია. დაშავდა 4 პიროვნება, ერთი დამწვრობით, ხოლო სამი მსუბუქი ინტოქსიკაციით. ყველა შესაბამისი სამსახური ადგილზეა და მიმდინარეობს შესაბამისი პროცედურები", - განაცხადა შსს-ს წარმომადგენელმა.
კითხვაზე, რამდენად უსაფრთხოა ახლა კორპუსი საცხოვრებლად, შინაგან საქმეთა სამინისტროს საგანგებო სიტუაციების მართვის სამსახურის წარმომადგენელი პასუხობს, რომ ადგილზე მუნიციპალური ყველა სამსახურია მობილიზებული და ისინი შეაფასებენ სიტუაციას და აღნიშნა, რომ ამ დროისთვის უსაფრთხოების ზომები მიღებულია.
