მიხეილ სააკაშვილის ულიტიმატუმს მმართველ გუნდში ეხმაურებიან - "ქართულ ოცნებაში" ამბობენ, რომ ექსპრეზიდენტი მძიმე საქმეებზეა მსჯავრდებული და მან სასჯელი ციხეში უნდა მოიხადოს. მმართველ პარტიაში მიხეილ სააკაშვილის ულტიმატუმს არასერიოზულად აღიქვამენ.
პარლამენტის რეგიონული პოლიტიკისა და თვითმმართველობის კომიტეტის თავმჯდომარის მოადგილის ირაკლი ზარქუას თქმით, მიხეილ სააკაშვილი რაც უფრო სწრაფად გააცნობიერებს, რომ ის სასჯელს სამართლიანად იღებს და არის პატიმარი, მისთვისაც უკეთესი იქნება და ქვეყანაც დაისვენებს.
"მგონია, რომ ეს ადამიანი ისევ მოწყვეტილია რეალობას, ისევ ჰგონია თავი იმპერატორი ან მეფე. ჰგონია, რომ ბრძანებებს, რასაც იმ 9 წლის განმავლობაში აკეთებდა, ახლა ასე შეუსრულებენ.
რეალობა ის არის, რომ უკვე თვითონ დარჩა ამ თავის მიერ შექმნილ ილუზიაში. რაც უფრო სწრაფად გააცნობიერებს ბელადი, რომ ის არის პატიმარი, რომ ის იხდის სასჯელს სამართლიანად, მისთვისაც უკეთესი იქნება და მისი მიმდევრებისთვისაც და ყველა დაისვენებს, ქვეყანა დაისვენებს," - განაცხადა ირაკლი ზარქუამ.
შეგახსენებთ, რომ მსჯავრდებულმა ექსპრეზიდენტმა რამდენიმე ულტიმატუმი წააყენა, ერთ-ერთი მათგანი არის, რომ აღუდგეს სატელეფონო ზარების განხორციელების უფლება. წინააღმდეგ შემთხვევაში, სააკაშვილმა განაცხადა, რომ პროტესტის უკიდურეს ფორმას მიმართავს.
