პარტია „მოქალაქეები" მიხეილ სააკაშვილთან დაკავშირებით დროებითი საგამოძიებო კომისიის შექმნას მხარს არ დაუჭერს და შექმნის შემთხვევაში, კომისიის მუშაობაში არ ჩაერთვება.
როგორც ჟურნალისტებს ოპოზიციონერმა დეპუტატმა ალეკო ელისაშვილმა განუცხადა, მიხეილ სააკაშვილის წამება არ მომხდარა, მისი რუსთავის ციხიდან გლდანის სამკურნალო დაწესებულებაში გადაყვანა კი, იყო უღირსი საქციელი.
„დროებით საგამოძიებო კომისიის შექმნის აზრს ვერ ვხედავთ, რადგან ქვეყანაში უამრავი პრობლემაა და კარგი იქნებოდა, თუ რეალური პრობლემები გადაიჭრებოდა, რაც ხალხს აწუხებს - უმუშევრობა, გაჭირვება. ქვეყნიდან ხალხი გარბის. მთავრობაც აღიარებს, რომ კოვიდის მართვა ხელიდან გაექცა. კომისიები ამ საკითხზე რომ შევქმნათ, გაცილებით უკეთესი იქნებოდა და არა იმაზე, რაც გაზვიადებული და გაბუქებულია, თითქოს მიხეილ სააკაშვილი აწამეს და სული ამოხადეს. წამება არ მომხდარა, იყო უღირსი და გულის ამრევი ფაქტი, რომ იძულებით გადაიყვანეს. აშკარად ძალაც გამოიყენეს და უღირსი საქციელი იყო, რომ კადრები გაავრცელეს, თუმცა ძალით გაბუქებულ თემებზე კომისიის შექმნა და უზარმაზარი ენერგიის ხარჯვა არის ამაო. რა უნდა გამოვიძიოთ, სააკაშვილი აწამეს ციხეში? - უღირსი იყო მისი გადაყვანის მეთოდები", - განაცხადა ელისაშვილმა.
