ირანში „ჰამასის“ ლიდერის, ისმაილ ჰანიეს მკვლელობის შემდეგ მასობრივი დაკავებები დაიწყო.
როგორც „ნიუ იორკ თაიმსი“ წერს, დაპატიმრებულებს შორის არიან ირანის სადაზვერვო სამსახურის ოფიცრები, სამხედრო მაღალჩინოსნები, ირანის რევოლუციის გუშაგთა კორპუსის იმ რეზიდენციის თანამშრომლები, სადაც ისმაილ ჰანიე მოკლეს.
დაპატიმრებულია სულ 20 ადამიანი.
გარდა ამისა, გამოძიების ფარგლებში ირანელი სამართალდამცავები სწავლობენ ირანის ისლამური რესპუბლიკის აეროპორტებში დამონტაჟებული სათვალთვალო კამერების ჩანაწერებს და თვითმფრინავების მგზავრთა სიებს, რადგანაც არსებობს ვარაუდი, რომ „ჰამასის“ ლიდერის მკვლელები, შესაძლოა, ისევ ირანში იმყოფებოდნენ.
მანამდე ბრიტანულმა „დეილი ტელგრაფმა“ გაავრცელა ინფორმაცია, რომ ისრაელის სპეცსამსახურებმა, ისმაილ ჰანიეს მკვლელობის მიზნით, ირანის უსაფრთხოების სამსახურების თანამშრომლები გადაიბირეს.
როგორც გამოცემა წერს, აგენტები ისლამური რევოლუციის გუშაგთა კორპუსის ქვედანაყოფ „ანსარ ალ-მაჰდის”რიგებიდან არის შერჩეული, რომელიც ოფიციალური პირების უსაფრთხოებაზეა პასუხისმგებელი.
„დეილი ტელეგრაფის“ ინფორმაციით, აგენტებმა ასაფეთქებელი მოწყობილობა ირანის რევოლუციის გუშაგთა კორპუსის კუთვნილი სახლის სამ ოთახში დაამონტაჟეს, რისი დადგენაც სათვალთვალო კამერებით მოხერხდა.
როგორც გაზეთი წერს, მოწყობილობის დამონტაჟების შემდეგ „მოსადის“ დაქირავებულმა აგენტებმა ირანის ტერიტორია დატოვეს და ასაფეთქებელი მოწყობილობა დისტანციურად აამოქმედეს.
