პარლამენტის საპროცედურო საკითხთა კომიტეტმა ელენე ხოშტარიასთვის სადეპუტატო უფლებამოსილების შეწყვეტას მხარი დაუჭირა. საკითხი კენჭისყრაზე კომიტეტის დღევანდელ სხდომაზე დააყენეს.
სხდომაზე ოპოზიციის წარმომადგენლებმა აღნიშნეს, რომ შალვა ნათელაშვილისგან განსხვავებით, ელენე ხოშტარიას თავად არ სურს საპარლამენტო საქმიანობა და მანდატის შეწყვეტას თავად ითხოვს.
ოპოზიციის წარმომადგენლებმა მოითხოვეს, რომ ამ პოზიციის მიუხედავად, ელენე ხოშტარიას საკითხი დღევანდელ სხდომაზე არ განეხილათ, თავად ხოშტარიასთვის მიემართათ და შემდეგ სხდომაზე მომხდარიყო საკითხზე მსჯელობა.
შალვა შავგულიძის საპასუხოდ, კომიტეტის თავმჯდომარე ირაკლი ქადაგიშვილმა განაცხადა, რომ ვინც ამომრჩეველმა აირჩია, პარლამენტში უნდა იყოს, მაგრამ ვინც საკუთარ უფლებამოსილებას არ ასრულებს, პარლამენტი ვალდებულია, რეგლამენტი დაიცვას და მას სადეპუტატო უფლებამოსილება შეუწყვიტოს.
ელენე ხოშტარიასთვის სადეპუტატო უფლებამოსილების შეწყვეტის საკითხი 14-18 თებერვლის კვირაში პლენარულ სხდომას წარედგინება. გადაწყვეტილების მიღებას პლენარულ სხდომაზე დამსწრეთა უმრავლესობის მხარდაჭერა დასჭირდება.
