აშშ-ის პრეზიდენტმა, ჯო ბაიდენმა უკრაინისთვის დამატებითი სამხედრო დახმარების გამოყოფის შესახებ განაცხადა.
თეთრი სახლის მიერ გამოქვეყნებული განცხადებით, აშშ-ი მომდევნო თვეებში უკრაინას თითქმის რვა მილიარდ დოლარს გამოუყოფს.
„დღეს მე ვაცხადებ უკრაინისთვის უსაფრთხოების დახმარების მკვეთრ გაზრდას და დამატებით ზომებს, რომლებიც უკრაინას ომში გამარჯვებაში დაეხმარება“, – ნათქვამია აშშ-ის პრეზიდენტის განცხადებაში.
კერძოდ, ბაიდენმა დაავალა თავდაცვის სამინისტროს, სრულად გამოუყოს კიევს ის სახსრები, რომლებიც მისი პრეზიდენტობის ვადის ამოწურვამდე იყო გაწერილი უკრაინის სამხედრო დახმარებისთვის.
ამასთან, ბაიდენის განკარგულებით, შეიარაღების შემცირების შესახებ პრეზიდენტის უფლებამოსილების ფარგლებში, 5,5 მილიარდი დოლარი გამოიყოფა, რათა „ეს უფლებამოსილება უვადო იყოს, და ვაშინგტონმა შეძლოს, სრულად გამოიყენოს სახსრები, რომლებიც კონგრესმა გამოყო უკრაინის დასახმარებლად, აშშ-ის შეიარაღების შესამცირებლად და შემდგომ ამერიკის მარაგის შესავსებად.
„ასევე აშშ-ის თავდაცვის სამინისტრომ გამოაცხადა 2,4 მილიარდი დოლარის გამოყოფის შესახებ, უკრაინის უსაფრთხოების დახმარების ინიციატივის ფარგლებში, რომელიც უზრუნველყოფს უკრაინას დამატებითი საჰაერო თავდაცვის საშუალებებით, უპილოტო საავიაციო სისტემებით და „ჰაერი-მიწა“ კლასის საბრძოლო მასალით, ასევე გააძლიერებს უკრაინის სამხედრო სამრეწველო ბაზას და დაეხმარება უკრაინას ტექნიკური მომსახურებისა და მხარდაჭერის საჭიროებებში“, – ნათქვამია განცხადებაში.
უკრაინის შორ მანძილზე დარტყმის შესაძლებლობების გასაძლიერებლად, ბაიდენის გადაწყვეტილებით, უკრაინას გადაეცემა ფრთოსანი საავიაციო ბომბები (Joint Standoff Weapon), ხოლო საჰაერო თავდაცვითი პოტენციალის გასაზრდელად აშშ უკრიანას დამატებითი გადასცემს პეტრიოტის ტიპის საზენიტო-სარაკეტო კომპლექსს.
„უკრაინის საჰაერო თავდაცვის შემდგომი გაძლიერების მიზნით, მე დავავალე თავდაცვის სამინისტროს, შეაკეთოს და უკრაინას მიაწოდოს პერტოიტის ტიპის საზენიტო-სარაკეტო კომპლექსის დამატებითი ბატარეა, ასევე მიაწოდოს უკრაინას დამატებით პეტრიოტის რაკეტები“, – ნათქვამია აშშ-ის პრეზიდენტის განცხადებაში.
ბაიდენმა ასევე განაცხადა, რომ აშშ-ის იუსტიციის, ასევე ფინანსთა დეპარტამენტმა და საიდუმლო სამსახურმა, საერთაშორისო პარტნიორებთან ერთად, მიიღეს ზომები კრიპტოვალუტის გლობალური ქსელის გასანადგურებლად, რათა წინ აღუდგნენ რუსეთის სანქციებისგან თავის არიდებას და ფულის გათეთრებას.
ბაიდენმა ასევე დაავალა პენტაგონს, გააფართოოს უკრაინელი მფრინავების წვრთნა ეფ-16-ის ტიპის ავია გამანადგურებლების მართვაში. მომავალ წელს მომზადებას გაივლის კიდევ 18 უკრაინელი მფრინავი.
ამასთან, აშშ-ის პრეზიდენტმა, ჯო ბაიდენმა ოქტომბერში გერმანიაში „რამშტაინის ფორმატში“ ლიდერების სამიტი მოიწვია.
