ხვიჩა კვარაცხელიამ ჩემპიონთა ლიგაზე მეექვსე გოლი გაიტანა და „პარი სენ-ჟერმენს“ „ატალანტას“ დამარცხებაში დაეხმარა – 4:0.
ლიგის ძირითადი ეტაპის პირველ ტურში „პარი სენ-ჟერმენმა“ „ატალანტას“ უმასპინძლა. ხვიჩა კვარაცხელია ფრანგული გრანდის ძირითად შემადგენლობაში იყო, მოედანზე ერთ-ერთი გამორჩეული გახლდათ და 75-ე წუთზე შეცვალეს.
„პარი სენ-ჟერმენი“ პირველივე წუთებიდან დომინირებდა და მე-3 წუთზე ანგარიში ეფექტური კომბინაციის შემდეგ მარკიონოსმა გახსნა.
კვარამ თავი 39-ე წუთზე გამოიჩინა. ბურთიანად საჯარიმოსკენ დაიძრა და შორეული ეფექტური დარტყმით სხვაობა გაზარდა. ტაიმის ბოლოს მესამეს გატანა ბრედლი ბარკოლას შეეძლო, მაგრამ პენალტი ვერ გამოიყენა.
პარიზელებმა შესვენების შემდეგ „ატალანტას“ მესამე მაინც გაუტანეს – 51-ე წუთზე ნუნუ მენდეშმა მარცხენა ფლანგზე დრიბლინგი ლამაზი გოლით დაასრულა.
საბოლოო ანგარიში კი 90+1-ე წუთზე გონსალო რამოშმა დააფიქსირა – 4:0.
ჩემპიონთა ლიგის ძირითადი ეტაპის მეორე ტურის შეხვედრას „პარი სენ-ჟერმენი“ პირველ ოქტომბერს გამართავს და მსოფლიო ფეხბურთის გრანდს, „ბარსელონას“ ესტუმრება.
კვარაცხელია „ატალანტასთან“ შეხვედრაში საუკეთესოდ თავად მატჩის ორგანიზატორმა დაასახელა.
გარდა ამისა, საუკეთესო მოთამაშედ აღიარა ანალიტიკურმა ვებგვერდმა WhoScored-მაც, რომელმაც მისი თამაში 8.9 ქულით შეაფასა.
1tv.ge
