გარემოს ეროვნული სააგენტოს ინფორმაციით, 7 სექტემბერს საქართველოში ამინდი მნიშვნელოვნად გაუარესდება. დასავლეთ საქართველოს ყველა რეგიონში, ხოლო აღმოსავლეთში — შიდა ქართლში, მთიან და მაღალმთიან რაიონებში დროგამოშვებით ნალექია მოსალოდნელი, ზოგან ძლიერი ინტენსივობის.
სააგენტოს პროგნოზით, შესაძლებელია ელჭექი და სეტყვა, შავ ზღვაზე კი 4-5 ბალიანი შტორმია მოსალოდნელი. ქვეყნის უმეტეს ტერიტორიაზე, მათ შორის თბილისში, დასავლეთის ძლიერი ქარი იქროლებს.
გარემოს ეროვნული სააგენტო მოსახლეობას შესაძლო სტიქიური პროცესების შესახებ აფრთხილებს.
„მოსალოდნელმა ნალექებმა შესაძლებელია მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს“, — ნათქვამია სააგენტოს ინფორმაციაში.
მოსალოდნელი საფრთხის დონე საშუალოდ არის შეფასებული.
