თბილისში ახალი ტრამვაის ხაზის პროექტირება-მშენებლობის ხელშეკრულება გაფორმდა. დედაქალაქის მერიის ინფორმაციით, პროექტის ბიუჯეტი 287 654 321 ლარს შეადგენს.
ხელშეკრულებას თბილისის სატრანსპორტო კომპანიასა და თურქულ ერთობლივ საწარმო EYE-ს (Emre Ray + Yüksel + Erk) შორის მოეწერა ხელი.
ახალი ტრამვაის ხაზი დიდი დიღმის მე-3 და მე-4 მიკრორაიონების მიმდებარე ტერიტორიიდან დაიწყება და დავით აღმაშენებლის ხეივნისა და დიღმის მასივის გავლით მეტროსადგურ „დიდუბს“ დაუკავშირდება.
პროექტის მიხედვით, ტრამვაის ხაზის საორიენტაციო სიგრძე 7.5 კილომეტრი იქნება და მასზე 11 გაჩერება განთავსდება. პროექტის მიზანია დიდი დიღმის მეტროპოლიტენის ქსელთან დაკავშირება და ქალაქის ცენტრის მიმართულებით მგზავრობის დროის შემცირება.
პროექტი ასევე ითვალისწინებს ტრამვაის დეპოსა და შესაბამისი საინჟინრო ინფრასტრუქტურის მოწყობას. დეპო 11 ტრამვაის შემადგენლობის მომსახურებასა და ექსპლუატაციაზე იქნება გათვლილი.
მერიის ცნობით, ხაზის მშენებლობის პარალელურად ცალკე ტენდერი გამოცხადდება 10 ერთეული ტრამვაის შემადგენლობის შესაძენად.
პროექტის დასრულების შემდეგ ტრამვაის ხაზი თბილისის ერთიან საზოგადოებრივ სატრანსპორტო ქსელში ინტეგრირდება.
