გელა ისაშვილის აუდიოჩანაწერი გიორგი დავითაძის ოჯახმა გაავრცელა. ჩანაწერში პატიმარი აცხადებს, რომ დავითაძის მიმართ სოლიდარობის გამოხატვის შემდეგ თავადაც გახდა ციხის თანამშრომლების მხრიდან ძალადობის მსხვერპლი.
ისაშვილის მტკიცებით, პენიტენციური დაწესებულების თანამშრომლები დავითაძეს სისტემატურად აყენებდნენ სიტყვიერ შეურაცხყოფას და ახსენებდნენ მის მიმართ სავარაუდოდ განხორციელებულ სექსუალურ ძალადობას.
„ზუსტად ვიცი და მჯერა გიორგისი, რატომ იცი? ზუსტად მაგ დღისით, 2 რიცხვში ყველა თანამშრომელი დადიოდა და გიორგის აგინებდნენ, ხომ მაინც გაგაუპატიურეთ, შენი ასე და ისეო, ოჯახის მიმართულებით. მე აღნიშნულის გამო გამოვუცხადე სოლიდარობა, თავის დაზიანების ფორმით და თანამშრომლები ჩემთან რომ შემოვიდნენ, გიორგიმ დაიმსახურაო და მაგიტომ გავაუპატიურეთო, რეზინიანი თითითო, მაგის გამო თვალებში ვაფურთხე“, – ამბობს ისაშვილი გავრცელებულ ჩანაწერში.
პატიმარი ასევე ამტკიცებს, რომ მარიამობის დღესასწაულის მილოცვის გამო თანამშრომლებმა მას ფიზიკური შეურაცხყოფა მიაყენეს, რის შემდეგაც ხელბორკილებით ხანგრძლივად ჰყავდათ შეზღუდული და არაადამიანურ პირობებში ამყოფებდნენ.
„მარიამობის დღესასწაული აგვისტოში მივულოცე პატიმრებს და მაგის გამო შემომიცვივდნენ, აქეთ-იქიდან თავზე დამახტნენ, მერე ერთმანეთს გადაეფარნენ, მუხლებს მირტყამდნენ, დეესკალაციაში ჩამიყვანეს, მთელი დღის განმავლობაში ბორკილი ბოლომდე მქონდა გაჭერილი, სისხლები მდიოდა, ჩალურჯებული მქონდა, შემდეგ ტემპერატურით მაწამეს“, – აცხადებს მსჯავრდებული.
გავრცელებულ ბრალდებებს სპეციალური პენიტენციური სამსახური განცხადებით გამოეხმაურა და კატეგორიულად უარყო, რომ №6 დაწესებულებაში ხელმძღვანელობის ან თანამშრომლების მხრიდან არაადამიანურ მოპყრობას ჰქონდა ადგილი.
„სპეციალური პენიტენციური სამსახური კატეგორიულად უარყოფს მსჯავრდებულ გელა ისაშვილის მიერ გამოთქმულ ბრალდებებს, თითქოს №6 პენიტენციურ დაწესებულებაში დაწესებულების ხელმძღვანელობისა და თანამშრომლების მხრიდან ადგილი ჰქონდა არაადამიანურ მოპყრობას. აღნიშნული ბრალდებები სიმართლეს არ შეესაბამება და მსგავსი ფაქტი დაწესებულებაში არ მომხდარა“, – ნათქვამია განცხადებაში.
უწყება ყურადღებას ამახვილებს ისაშვილის წარსულსა და დისციპლინურ დარღვევებზე. პენიტენციური სამსახურის ინფორმაციით, მსჯავრდებული განზრახ მკვლელობისთვის იხდის სასჯელს და სისტემატურად არღვევს დაწესებულების შინაგანაწესს.
სამსახურის ცნობით, 2023 წელს №8 დაწესებულებაში ყოფნისას ისაშვილს აკრძალული ნივთი – კუსტარულად დამზადებული ალკოჰოლური სასმელი აღმოუჩინეს, რის გამოც სასჯელი დაემატა. იმავე წელს პროკურორისთვის სიტყვიერი შეურაცხყოფის მიყენების გამოც დამატებითი სასჯელი დაეკისრა.
უწყების განმარტებით, განმეორებითი დარღვევების გამო ისაშვილი 2025 წლის 8 აგვისტოს მაღალი რისკის №6 პენიტენციურ დაწესებულებაში გადაიყვანეს.
„აღნიშნულ დაწესებულებაშიც გელა ისაშვილი განაგრძობდა სარეჟიმო მოთხოვნების დარღვევას, რის გამოც არაერთი დისციპლინური სახდელი აქვს დაკისრებული. უფრო მეტიც, 2026 წლის აგვისტოში მან სასეირნო სივრცეში ფიზიკური შეურაცხყოფა მიაყენა დაწესებულების თანამშრომელს. აღნიშნულ ფაქტზე დაწყებულია გამოძიება და ყველა შესაბამისი მასალა გადაგზავნილია საგამოძიებო ორგანოში“, – აცხადებს პენიტენციური სამსახური.
უწყება საზოგადოებას მოუწოდებს, კრიტიკულად შეაფასოს იმ პირების განცხადებები, რომლებიც, მისი შეფასებით, დისციპლინური დარღვევებითა და პროვოკაციული ქმედებებით გამოირჩევიან.
„სპეციალური პენიტენციური სამსახური მოუწოდებს საზოგადოებას, კრიტიკულად შეაფასოს მსგავსი დარღვევებითა და პროვოკაციული ქმედებებით გამორჩეული პირების მიერ გავრცელებული განცხადებები, არ აჰყვეს დაუდასტურებელ ბრალდებებს და დაეყრდნოს მხოლოდ გადამოწმებულ ინფორმაციას“, – ნათქვამია განცხადებაში.
გიორგი დავითაძისა და გელა ისაშვილის მიერ გავრცელებული ბრალდებები მძიმე შესაძლო დანაშაულებს, მათ შორის სექსუალურ ძალადობასა და არაადამიანურ მოპყრობას ეხება. პენიტენციური სამსახურის განცხადებაში მოყვანილი ცნობები ისაშვილის დისციპლინური დარღვევების შესახებ დამოუკიდებლად არ ადასტურებს და არც გამორიცხავს მის მიერ აღწერილი ძალადობის ფაქტებს.
ამ ეტაპზე წარმოდგენილი ინფორმაციით, უცნობია, მიმდინარეობს თუ არა დამოუკიდებელი გამოძიება ისაშვილის მიერ აღწერილ სავარაუდო ძალადობის თითოეულ ეპიზოდზე და ჩატარდა თუ არა შესაბამისი სამედიცინო-საექსპერტო შემოწმება.
