ლიეტუვის საგარეო საქმეთა მინისტრის, გაბრიელიუს ლანდსბერგისის განცხადებით, გერმანიის საგარეო საქმეთა მინისტრთან შეხვედრის მთავარი თემები იყო NATO-ს აღმოსავლეთ ფლანგზე თავდაცვის შესაძლებლობების გაძლიერება, სამხედრო, ჰუმანიტარული და პოლიტიკური მხარდაჭერა უკრაინისთვის და რუსეთის წინააღმდეგ ახალი სანქციების დაწესება. მისივე თქმით, გარდაუვალია რუსეთისთვის სანქციების გამკაცრება, რადგან ის ენერგოსექტორიდან მიღებულ შემოსავალს ომის დასაფინანსებლად იყენებს.
"ჩვენი საუბრის მთავარი თემა იყო ის, თუ როგორ შეგვიძლია დავეხმაროთ უკრაინას, გავზარდოთ ზეწოლა რუსეთზე და გავაძლიეროთ NATO-ს ფრონტი ახალი საფრთხეების ფონზე. რუსეთის ქმედებებმა ძირეულად შეცვალა უსაფრთხოების გარემო ევროპაში და ეს ცვლილებები NATO-ს მადრიდის სამიტის გადაწყვეტილებებშიც უნდა აისახოს. რუსეთის მიერ აღმოსავლეთ უკრაინაში სამხედრო მოქმედებების გააქტიურების ფონზე, უკრაინას ჩვენი თანადგომა და შესაბამისი აღჭურვილობა სჭირდება. ჩვენ ვიმსჯელეთ სანქციების მეექვსე პაკეტზე შეთანხმების მისაღწევად საჭირო ნაბიჯებზე. ეს რთული გადაწყვეტილებაა იმ ქვეყნებისთვის, რომლებიც დიდწილად რუსულ ენერგორესურსებზე არიან დამოკიდებულნი, თუმცა სანქციების გამკაცრება გარდაუვალია, რადგან რუსეთი ენერგოსექტორიდან მიღებულ შემოსავალს ომის დასაფინანსებლად იყენებს,"- აცხადებს გაბრიელიუს ლანდსბერგისი.
ცნობისთვის, ლიეტუვის საგარეო საქმეთა მინისტრი, გაბრიელიუს ლანდსბერგისი და გერმანიის საგარეო საქმეთა მინისტრი ანალენა ბერბოკი ლიეტუვაში შეხვდნენ და ერთობლივი პრესკონფერენცია გამართეს.
