„ჩვენ ვიწყებთ ქვეყნის მასშტაბურ განახლებას",- განაცხადა პრემიერ-მინისტრმა, ირაკლი ღარიბაშვილმა დღევანდელ მთავრობის სხდომაზე.
ღარიბაშვილმა 500 მილიონიანი პროექტი დააანონსა.
პრემიერის თქმით, დაგეგმილია რეგიონების ურბანული განახლების პროექტი, რომლის ფარგლებში 15 000 სამუშაო ადგილი შეიქმნება. ირაკლი ღარიბაშვილი ამბობს, რომ პროექტის პირველი ეტაპის ღირებულება 500 მლნ ლარს შეადგენს, რომელიც როგორც სახელმწიფო ბიუჯეტიდან, ისე საერთაშორიო საფინანსო ინსტიტუტების დახმარებით გამოიყოფა.
„ვიწყებთ ქვეყნის მასშტაბურ განახლებას. ეს პროგრამა გულისხმობს 63 მუნიციპალიტეტში ურბანულ განახლებას, მნიშვნელოვანი კულტურული და ისტორიული ობიექტების რეაბილიტაციას, მუნიციპალიტეტების ადმინისტრაციული ცენტრების რეაბილიტაციას, ასევე რეკრეაციული სივრცეების მოწყობას, რეკრეაციულ პარკებში ტურისტული ინფრასტრუქტურის განვითარებას, ყველა მუნიციპალიტეტში მნიშვნელოვანი საზოგადოებრივი ობიექტების რეაბილიტაციას და მოწყობას. ყველა ქალაქის, ყველა მუნიციპალიტეტის, კურორტების და დასახლებების ურბანულ განახლებას. პროგრამის ფარგლებში შეიქმნება ახალი დასასვენებელი და ტურისტული ზონები. საქართველოში უამრავი ადგილია, რომელიც უნდა გავხადოთ მიმზიდველი პირველ რიგში ჩვენი მოქალაქეებისთვის და ჩვენი ტურისტებისთვის", - განაცხადა ირაკლი ღარიბაშვილმა.
პერმიერის, განცხადებით ტენდერები ამ კვირაშივე გამოცხადდება, პროექტების განხორციელება კი ივნისიდან დაიწყება.
