რუსეთის უკრაინაში შეჭრის ფონზე, მოლდოვის ტერიტორიაზე ომის გავრცელების უშუალო საფრთხეს ვერ ვხედავ. ამის შესახებ მოლდოვას პრემიერ-მინისტრმა ნატალია გავრილიტასმა „რადიო თავისუფლების“ მოლდოვის სამსახურთან ინტერვიუში განაცხადა.
„ჩვენი ანალიზი აჩვენებს, რომ მოლდოვაში ომის გაფართოების გარდაუვალი რისკები არ არსებობს“, – განაცხადა გავრილიტამ.
მისივე თქმით, იმ შემთხვევაში, თუ რუსეთის მიერ მხარდაჭერილი სეპარატისტები ოფიციალურ კიშინიოვს თავს დაესხმებიან, დასავლეთის მხარდაჭერის გარეშე მოლდოვა ხანგრძლივი წინააღმდეგობის გაწევას ვერ შეძლებს.
გავრილიტას განცხადებით, არ მიიჩნევს, რომ რუსეთის თავდასხმა მოსალოდნელია, რადგან მოლდოვა ნეიტრალური ქვეყანაა, რომელსაც „არასდროს სურდა და არ ცდილობდა ნატო-ში გაწევრიანებას“.
მოლდოვის პრემიერ-მინისტრის თქმით, მის ქვეყანაზე რუსეთის თავდასხმა უკუშედეგის მომტანი იქნება, რადგან ბევრი მოლდოველი რუმინეთის ორმაგ მოქალაქეობას ფლობს, რომელიც ევროკავშირისა და ნატო-ს წევრია. შესაბამისად, მოლდოვაში შეჭრა გამოიწვევს სხვა სახელმწიფოების ბევრად უფრო ფართო ჩართულობას.
ფოტო: https://www.rferl.org/
