ოპონენტებისგან კარგს არაფერს ველოდებით, გარდა იმისა, რომ მათი მცდელობაა, ყველაფერს აკეთებენ, რათა საქართველომ სტატუსი არ მიიღოს, – ამის შესახებ დედაქალაქის მერმა კახა კალაძემ განაცხადა.
მისივე თქმით, საქართველომ ყველაფერი გააკეთა, რათა სტატუსი მიიღოს. როგორც კალაძე ამბობს, სწორედ ამიტომ, მოლოდინი პოზიტიური აქვთ.
„რაც შეეხება მოლოდინებს, ვფიქრობ, საქართველომ ყველაფერი გააკეთა, განსაკუთრებით ბოლო წლების განმავლობაში, რათა ქვეყანამ ეს სტატუსი მიიღოს. თუ გადაწყვეტილება იქნება იმასთან დაკავშირებით, რომ სტატუსს არ მოგვცემენ, ჩვენ მაინც გავაგრძელებთ გზას ევროინტეგრაციისთვის, რათა მოხვდეთ იმ დიდ ოჯახში, რასაც ევროპა, ევროკავშირი ჰქვია. თუმცა, მგონია, რომ გადაწყვეტილება იქნება დადებითი“, – განაცხადა კახა კალაძემ.
კითხვაზე, ხომ არ მიგაჩნიათ, რომ თქვენი გუნდის წევრების განცხადებები ევროინტეგრაციის გზაზე დამაზიანებელია, კალაძემ აღნიშნა: „როდესაც ისმის შეურაცხმყოფელი განცხადებები, ხდება შეურაცხმყოფელი რეზოლუციის მიღება, რომელიც პირდაპირ შეურაცხყოფაა ქართველი ხალხის, რა თქმა უნდა, ჩვენი მხრიდან ამას ყოველთვის მოჰყვება შესაბამისი პასუხები“, – განაცხადა კახა კალაძემ.
კიდევ ერთ კითხვაზე: „ირაკლი კობახიძე ამბობს, კომისიამ და საბჭომ რომ გაიმეოროს ის, რაც ევროპარლამენტის რეზოლუციაში წერია, ძალიან მძიმე რეაქცია დადგება, რას ნიშნავს ეს მძიმე რეაქცია“, კალაძემ განაცხადა, რომ ყველაფერს აეხდება ფარდა და ყველაფერს იტყვიან, რაც რეალურად ხდება.
„ამასთან დაკავშირებით იქნა გაკეთებული განცხადებები. ყველაფერს აეხდება ფარდა და ყველაფერს ვიტყვით, რეალურად რა ხდება“, – განაცხადა კალაძემ.
