,,გიჟი უნდა ვიყო, რომ ამაზე ვთქვა არა, ეს არ მინდა-მეთქი," - ასეთია თბილისის მერობის კანდიდატურასთან დაკავშირებით პარტია ,,გირჩი მეტი თავისუფლების" ლიდერის, ზურა ჯაფარიძის დამოკიდებულება.
ჯაფარიძე არ მალავს, რომ აქვს მოლოდინები ოპოზიციის მხრიდან თბილისის მერობის ერთიან კანდიდატურად იქნეს დასახელებული. მისივე თქმით ის ისედაც აპირებს, რომ საკუთარი პარტიის სახელით მიიღოს 2021 წლის, ადგილობრივი თვითმმართველობის არჩვენებში მონაწილეობა.
,, თუ შემოთავაზება იქნება, თანახმა ვარ. ისედაც ვაპირებ, რომ დავდგე და თუ ერთიანი კანდიდატი იქნება, ცხადია, უკეთესია. ჯერჯერობით რაიმე ასეთი კონსულტაცია არ ყოფილა, არ მქონია კონსულტაცია. ჩემთან პარტიაში ასეთი განწყობაა, რომ ოქტომბრის საპარლამენტო არჩევნებზე გაყალბების მიუხედავად , ჩვენ ყველაზე პატარა დანახარჯებით თბილისში მე-3 ადგილზე გავედით. შესაბამისად, ჩვენს პარტიას აქვს ამბიცია, რომ თბილისში ჰყავდეს საკუთარი კანდიდატი. ეს არის ახლა, ამ წუთში მოცემულობა. ჯერ პარტიაში მიღებული არ არის ამაზე გადაწყვეტილება, ამიტომ, ცალსახად ვაპირებ თუ არა კანდიდატობას, ვერ გეტყვით, მაგრამ ეს განიხილება. თუ ამას დაემატება ის, რომ ვიქნები ერთიანი კანდიდატი, ცხადია, ეს პლუსია. გიჟი უნდა ვიყო, რომ ამაზე ვთქვა არა, ეს არ მინდა-მეთქი. რატომ არ უნდა მინდოდეს?," - განაცხადა ჯაფარიძემ.
