„2016 წლის 19 მაისს საქართველოს მოქალაქე გიგა ოთხოზორიას სასტიკმა მკვლელობამ, ნათლად წარმოაჩინა საოკუპაციო რეჟიმის არაჰუმანური და დამნაშავეობრივი სახე," - ნათქვამია სახელმწიფო უსაფრთხოების სამსახურის მიერ დღეს, 19 მაისს გავრცელებულ განცხადებაში.
შეგახსენებთ: 2016 წლის 19 მაისს, ოკუპირებული აფხაზეთის საოკუპაციო ხაზთან, სოფელ ხურჩასთან, ე.წ. აფხაზმა მესაზღვრე რაშიდ კანჯი-ოღლიმ ცეცხლსასროლი იარაღით გიგა ოთხოზირია მოკლა. მკვლელობა შელაპარაკებას მოჰყვა.
ოთხოზორიას მკვლელობის საქმეზე ადამიანის უფლებათა ევროპულ სასამართლოს ოჯახის წევრებმა საჩივრით 2018 წელს მიმართეს. საჩივარში ე.წ. აფხაზი მესაზღვრის მიერ ძალის უკანონო გამოყენების შედეგად სიცოცხლის მოსპობისა და ამ ფაქტზე წარმოებული გამოძიების არაეფექტურობაზე დავობენ.
სუს-ში აცხადებენ, რომ აღნიშნულმა უკიდურესად დააზიანა საოკუპაციო ხაზის გასწვრივ და ოკუპირებ ტერიტორიაზე არსებული უსაფრთხოების გარემო და კიდევ ერთხელ წარმოჩინა ოკუპაციის მძიმე შედეგები.
„საქართველოს ცენტრალური ხელისუფლებისა და საერთაშორისო პარტნიორების არაერთი კატეგორიული მოთხოვნის მიუხედავად, გიგა ოთხოზორიას მკვლელობაში მონაწილე პირები, რუსეთის საოკუპაციო ძალების გადაწყვეტილებით კვლავ არ დასჯილან.
საქართველოს ცენტრალური ხელისუფლება იყენებს მის ხელთ არსებულ ყველა ბერკეტს, მოქმედ საერთაშორისო ფორმატებსა და ინსტრუმენტებს რათა დანაშაულის ჩამდენი პირები წარდგნენ მართლმსაჯულების წინაშე," - ნათქვამია სუს-ის მიერ გავრცელებულ განცხადებაში.
