ჩრდილოეთ კორეა აშშ-ს, იაპონიას და სამხრეთ კორეას აზიაში ნატო-ს მსგავსი ორგანიზაციის შექმნის მცდელობაში სდებს ბრალს „სიენენის“ ინფორმაციით, აღნიშნულის შესახებ ჩრდილოეთ კორეის საგარეო საქმეთა სამინისტროს სპიკერმა განაცხადა.
მედიის თქმით, სამინისტროს სპიკერი გამოეხმაურა ცოტა ხნის წინ აშშ-ს, იაპონიას და სამხრეთ კორეას შორის დადებულ ხელშეკრულებას სამხედრო თანამშრომლობის შესახებ და სახელმწიფოები ნატო-ს მსგავსი ორგანიზაციის შექმნის მცდელობაში დაადანაშაულა.
„რეალობა მკაფიოდ აჩვენებს, რომ აშშ-ის მიერ ჩრდილოეთ კორეიდან მომდინარე საფრთხეების შესახებ გავრცელებული ჭორების მთავარი მიზანი, აზია-წყნარი ოკეანის რეგიონში სამხედრო უპირატესობის შექმნის გამართლებას წარმოადგენს. შექმნილი ვითარება სასწრაფოდ მოითხოვს ქვეყნის თავდაცვის სწრაფ განვითარებას, რათა აქტიურად გავუმკლავდეთ უსაფრთხოების კუთხით ვითარების სწრაფ გაუარესებას“, – განაცხადა სპიკერმა.
მიმდინარე კვირას, ნატო-ს მადრიდის სამიტზე აშშ-ის, იაპონიის და სამხრეთ კორეის ლიდერებმა განაცხადეს, რომ ჩრდილოეთ კორეის ბირთვული და სარაკეტო პროგრამები სერიოზულ საფრთხეს უქმნის არა მარტო კორეის ნახევარკუნძულს, არამედ მთელს აღმოსავლეთ აზიას და მსოფლიოს და ერთმანეთთან სამხედრო სფეროში თანამშრომლობაზე შეთანხმდნენ.
