დოკუმენტი, რომლითაც მიხეილ სააკაშვილზე პოლიტიკური შურისძიება დასტურდება

„ევროპული საქართველოს" წევრები მიხეილ სააკაშვილის წინააღმდეგ პოლიტიკური შურისძიების დამდასტურებელ დოკუმენტაციას ავრცელებს.

დოკუმენტებით დგინდება, რომ პენიტენციური სამსახური მომსახურებას ბრალდებულებისა და მსჯავრდადებულებისთვის კერძო კლინიკებიდან წლებია, იღებს. მხოლოდ წელს ასეთი მომსახურებით უკვე 3 000-ზე მეტმა ბრალდებულმა ისარგებლა.

3 ნოემბერს კი, პენიტენციური სამსახურის გენერალურმა დირექტორმა სახელმწიფო შესყიდვების თავმჯდომარეს მიმართა, დამატებით 400 000 ლარის შესყიდვა განხორციელდეს პატიმრების მკურნალობისთვის სხვადასხვა სამოქალაქო სამედიცინო დაწესებულებაში.

„ევროპული საქართველოს" წევრები უწყებას დისკრიმინაციულ მიდგომაში ადანაშაულებს და აცხადებენ, რომ მიხეილ სააკაშვილი პოლიტიკური ნიშნით არ გადაჰყავთ სამოქალაქო კლინიკაში.

"პენიტენციური სისტემა ვერ განახორციელებს ვერც ერთ შესყიდვას პრემიერმინისტრ ღარიბაშვილისგან თუ არ იქნება თანხმობა. პრემიერმინისტრ ღარიბაშვილისგან თანხმობა აქვს და უმატებს 400 000 ლარს ბრალდებულებისთვის და მსჯავრდადებულებისთვის, რომ გადაიყვანონ სამოქალაქო კლინიკებში. ანუ არსებობს იმის თანხმობა, რომ თანხა დაემატოს, უბრალოდ არ არსებობს თანხმობა მხოლოდ სააკაშვილის მიმართულებით. სააკაშვილისთვის არ არსებობს ეს თანხმობა, იმიტომ, რომ ეს არის მისი პოლიტიკური გადაწყვეტილება, რომ ეს პატიმარი არ უნდა გადაიყვანონ სამოქალაქო კლინიკაში", - განაცხადა „ევროპული საქართველოს" წევრმა, ბესიკ დონაძემ.

მიმართვის განმარტებით ბარათში აღნიშნულია, რომ ბოლო ერთი წლის განმავლობაში სამოქალაქო კლინიკებში გადაყვანილი პირების მომსახურებაზე დაახლოებით 5 მილიონი ლარი დაიხარჯა.

უწყებას ასეთი 38 სამედიცინო დაწესებულება აქვს შერჩეული, რომელთანაც პენიტენციური ხელშეკრულებებს აფორმებს. მსგავსი ტიპის 81 ხელშეკრულება იძებნება.