პირდაპირმა უცხოურმა ინვესტიციებმა 64%-ით იკლო
11.06.2024 ნახვები: 437
პირდაპირი უცხოური ინვესტიციების მოცულობა მიმდინარე წლის I კვარტალში 201.4 მილიონ დოლარამდე შემცირდა, რაც წლიურად 64.4%-იანი კლებაა.
ეს მაჩვენებელი პირველი კვარტლისთვის პანდემიის პერიოდის (2020-2021) შემდეგ ყველაზე დაბალია. ასევე საგულისხმოა, რომ გასული ორი წლის პირველ კვარტალებში პირდაპირი უცხოური ინვესტიციების მოცულობა ნახევარ მილიარდს აჭარბებდა.
გასულ კვარტალში კი კლება დაფიქსირდა სამივე კომპონენტში - სააქციო კაპიტალში (-78%), რეინვესტიციაში (-51%) და სავალო ვალდებულებებში (-8%).
ინვესტიციები ქვეყნების მიხედვით ასე გადანაწილდა:
- თურქეთი - 42.4 მლნ. დოლარი (21%)
- ჩეხეთი - 41.5 მლნ. დოლარი (20.6%)
- აშშ - 33.7 მლნ. დოლარი (16.7%)
- ნიდერლანდები - 32.3 მლნ. დოლარი (16%)
- მარშალის კუნძულები (ოფშორი) - 22.3 მლნ. დოლარი (11%)
ყველაზე მეტი ინვესტიცია ენერგეტიკის სექტორში განხორციელდა - 78.7 მლნ. დოლარი (39.1%), მეორე ადგილზეა ვაჭრობის სექტორი - 39.5 მლნ. დოლარით (19.6%), ხოლო მესამეზე ტრანსპორტის სექტორი 38.8 მლნ. დოლარით (19.3%).
საგულისხმოა, რომ პირველ კვარტალში უარყოფითი FDI აქვს საფინანსო სექტორს, რაც ამ სექტორისთვის დამახასიათებელი არ არის და გასულ წლებში, მოზიდული პირდაპირი უცხოური ინვესტიციებით სწორედ ეს სექტორი იყო ერთ-ერთ ლიდერ პოზიციაზე. ბოლოს სექტორში უარყოფითი მაჩვენებელი 2019 წლის მეორე კვარტალში და 2016 წლის მეოთხე კვარტალში დაფიქსირდა.
