საქართველოს საპატრიარქო აზერბაიჯანის ტერიტორიაზე მდებარე ქურმუხის წმინდა გიორგის ტაძარსა და მის მიმდებარე ტერიტორიაზე მიმდინარე სამუშაოების შესახებ ოფიციალური ინფორმაციის მოპოვებასა და პროცესში საქართველოს შესაბამისი სახელმწიფო უწყებების ჩართვას ითხოვს. საპატრიარქოს განცხადებით, აზერბაიჯანის სახელმწიფო უწყებებისგან სამუშაოების შესახებ ინფორმაცია არ მიუღია.
საპატრიარქო ეხმაურება სოციალურ ქსელებსა და მედიაში გავრცელებულ ფოტო-ვიდეომასალას, რომლის მიხედვითაც, ისტორიულ ჰერეთში, ქურმუხის ტაძრის ტერიტორიაზე სამუშაოები მიმდინარეობს.
„მართალია, ქურმუხის ტაძარი დღეს აზერბაიჯანის რესპუბლიკის ტერიტორიაზე მდებარეობს, თუმცა ის ჩვენი ქვეყნისა და ეკლესიის ისტორიული და სულიერი მემკვიდრეობის უმნიშვნელოვანესი ძეგლია“, - ნათქვამია განცხადებაში.
საპატრიარქოს შეფასებით, გავრცელებულმა ინფორმაციამ საზოგადოებაში მწვავე რეაქცია გამოიწვია, რაც შესაძლოა უარყოფითად აისახოს საქართველოსა და აზერბაიჯანს შორის კეთილმეზობლურ ურთიერთობებზე. უწყებაში აცხადებენ, რომ კითხვებს აჩენს როგორც სამუშაოების მიზანი, ისე ის გარემოება, რომ ტაძარში ან მის მიმდებარე ტერიტორიაზე შესაძლო ჩარევა ქართულ მხარესთან შეუთანხმებლად მიმდინარეობს.
„ამ ეტაპზე მნიშვნელოვანია დადგინდეს, რა სახის სამუშაოები მიმდინარეობს ტაძრის ტერიტორიაზე, რა კვლევებს ეფუძნება და ვინ ახორციელებს მათ, ასევე, როგორ არის უზრუნველყოფილი ქართული კულტურული მემკვიდრეობის ძეგლის დაცვა“, - აღნიშნულია განცხადებაში.
საპატრიარქო მიიჩნევს, რომ საქართველოს შესაბამისმა სახელმწიფო უწყებებმა საკითხზე ოფიციალური ინფორმაცია უნდა მოიპოვონ და ხელი შეუწყონ მის განხილვაში საპატრიარქოს წარმომადგენლებისა და ქართველი დარგობრივი სპეციალისტების ჩართვას.
„ვფიქრობთ, მხოლოდ დროული და კოორდინირებული თანამშრომლობით არის შესაძლებელი ქართული სულიერი და კულტურული მემკვიდრეობის ძეგლის სათანადო დაცვა და შენარჩუნება“, - ნათქვამია საპატრიარქოს განცხადებაში.
