„ვითიბი ბანკ ჯორჯიას“ სამეთვალყურეო საბჭო ქართველმა წევრებმა მერაბ კაკულია და გოჩა მაცაბერიძემ დატოვეს.
ცნობილი ხდება, რომ მათ სამეთვალყურეო საბჭოში უფლებამოსილება საკუთარი განცხადების საფუძველზე შეუწყდათ.
ამჟამად საბჭოში მხოლოდ 4 წევრი - ოთხივე რუსეთის ფედერაციის მოქალაქე რჩება: სერგეი სტეპანოვი, ილნარ შაიმარდანოვი, იულია კოპიტოვა და ასია ზახაროვა.
სანქციების გამო რუსული „ვითიბის“ ქართული შვილობილი ამჟამად ტრანზაქციებს ვერ ახორციელებს, რის გამოც ვითიბიმ პორტფელის უდიდესი ნაწილი გაასხვისა.
საცალო სესხებისა და დეპოზიტების პორტფელი „ბაზისბანკმა“ გადაიბარა, ხოლო მცირე და საშუალო ბიზნესსესხებისა და დეპოზიტების პორტფელი - „ლიბერთიმ“.
2021 წელი ვითიბი ბანკ ჯორჯიამ“ 1.552 მლრდ ლარის სესხების პორტფელით დახურა, 2022 წლის I კვარტალის ბოლოს მთლიანი სესხები მხოლოდ 347 მლნ ლარამდე იყო.
ბანკის აქტივებიც 4-ჯერ შემცირდა და 2.1 მილიარდის ნაცვლად, ახლა „ვითიბის“ აქტივები ნახევარ მილიარდ ლარს მცირედით აღემატება.
გავრცელებული ინფორმაციით, განიხილება „ვითიბი ბანკ ჯორჯიას“ მფლობელის ცვლილებაც.
