პოდოლიაკის განცხადება არის პირდაპირი ჩარევა სხვა ქვეყნის შიდა საქმეებში. საქართველოს მოსახლეობა პოდოლიაკის ჭკუით რომ ირჩევდეს საკუთარ ხელისუფლებას, ქვეყანას არ ექნებოდა ის მშვიდობიანი პოლიტიკა, რაც მას საბედნიეროდ დღეს აქვს, – ამის შესახებ მოძრაობა „ხალხის ძალის“ წევრმა, დიმიტრი ხუნდაძემ განაცხადა.
ხუნდაძის თქმით, „საქართველო უკრაინას მხარს ყველა თვალსაზრისით უჭერს, მაგრამ ქვეყანა რისკებს ხედავს იმაში, თუ უკრაინას იარაღით დაეხმარება“.
„ჩვენ ვართ ოკუპირებული ქვეყანა, საკუთარი რისკები გვაქვს და როგორც სხვა ქვეყნები გამოდიან საკუთარი ინტერესებიდან, რა თქმა უნდა, ამის უფლება საქართველოსაც აქვს. ასევე, ქვეყანას აქვს ვალდებულება, დაიცვას საკუთარი ინტერესი და მშვიდობა, რისი ფასიც გამორჩეულად ვიცით, სხვა ქვეყნებთან შედარებით. რა იარაღს გვთხოვენ? – ის, რომ თითქოს, საქართველომ ომის პერიოდში უკრაინისგან იარაღი მიიღო, ეს ასე არ არის. უკრაინისგან ომის პერიოდში იარაღი არ მიგვიღია. ეს მანამდე იყო, ეს არ იყო საჩუქარი, იყო საკმაოდ წონადი ფინანსური რესურსებით შეძენილი იარაღი და აქაც საკმაოდ ბევრი კითხვაა, მაგრამ ამ საკითხებში ახლა არ შევდივართ. ფაქტია, რომ პოლიტიკური თუ ჰუმანიტარული თვალსაზრისით საქართველო უკრაინის მხარესაა, მაგრამ საქართველო მისივე ინტერესებიდან გამომდინარე, უკრაინას შეიარაღებას ვერ გადასცემს. ეს ყველაფერი არის მცდელობა, რომ საქართველო დაფიქსირდეს მხარედ შეიარაღებულ კონფლიქტში. ეს არის იმ პოლიტიკის ნაწილი, რომ საქართველო უნდა იქცეს მეორე ფრონტად, რაც ჩვენს ინტერესებს სცდება და კატეგორიულად მიუღებელია“, – განაცხადა ხუნდაძემ.
ცნობისათვის, ანდრეი კასიანოვის განცხადებით, კიევმა ითხოვა „ბუკის“ კომპლექსების გადაცემა, რომლებიც უკრაინამ საქართველოს 2008 წლის ომის დროს გადასცა. მისივე თქმით, უკრაინის თხოვნა მოიცავდა ამერიკის შეერთებული შტატების მიერ საქართველოსთვის გადაცემულ Javelin-ის სისტემებს და ამ უკანასკნელთან დაკავშირებით იყო არა მხოლოდ თანხმობა შეერთებული შტატების მხრიდან, არამედ მათი ახალი კომპლექსებით ჩანაცვლების წინადადებაც კი.
ამავე თემაზე:
გია ვოლსკი - პოდოლიაკის განცხადება შეგვიძლია, შევაფასოთ, როგორც უტიფრობა
გია ვოლსკი - კასიანოვი არაადეკვატურია თავის მოქმედებებში
თავდაცვის სამინისტრო - საქართველოს „ბუკისა“ და „ჯაველინის“ სისტემები უსასყიდლოდ არ მიუღია
მიხეილ სააკაშვილი - სირცხვილია უკრაინისთვის „ბუკ“-ის სისტემების მიცემაზე უარის თქმა
