ვილი სანიოლმა საქართველოს ეროვნული საფეხბურთო ნაკრების მთავარი მწვრთნელის თანამდებობა დატოვა. საქართველოს ფეხბურთის ფედერაციის ინფორმაციით, ეროვნულ გუნდს 2028 წლის ბოლომდე ქართველი სპეციალისტი რამაზ სვანაძე უხელმძღვანელებს.
ფრანგი მწვრთნელი საქართველოს ნაკრებს 2021 წლის თებერვლიდან ხელმძღვანელობდა. მისი მუშაობის პერიოდში ეროვნულმა გუნდმა 57 მატჩი ჩაატარა და ისტორიულ წარმატებას მიაღწია: 2024 წელს პირველად იასპარეზა ევროპის ჩემპიონატის ფინალურ ეტაპზე, დაძლია ჯგუფური ეტაპი და ტურნირის საუკეთესო 16 გუნდს შორის მოხვდა.
რამაზ სვანაძე აქამდე საქართველოს 21-წლამდელთა ნაკრების მთავარი მწვრთნელი იყო. მისი ხელმძღვანელობით ახალგაზრდულმა გუნდმა ევროპის ჩემპიონატის ფინალურ ეტაპზე ორჯერ იასპარეზა.
ფეხბურთის ფედერაციის ცნობით, 21-წლამდელთა ნაკრების საკვალიფიკაციო ეტაპის ბოლო სამ შეხვედრაში სვანაძეს მისი ასისტენტი გიორგი ადამია შეცვლის.
„მადლობა ვილი სანიოლს საქართველოს ნაკრებში გატარებული თითოეული წუთისთვის და იმ ემოციებისთვის, რომლებიც ამ ისტორიულ გზაზე ერთად გამოვიარეთ“, - ნათქვამია საქართველოს ფეხბურთის ფედერაციის განცხადებაში.
