უკრაინამ რუს მილიარდერს, მიხაილ შელკოვს უკრაინული აქტივები ჩამოართვა. ქონების კონფისკაციის შესახებ გადაწყვეტილება უკრაინის უმაღლესმა ანტიკორუფციულმა სასამართლომ იუსტიციის სამინისტროს სარჩელზე მიიღო.
უკრაინული მედიის ცნობით, მიხაილ შელკოვი „ფორბსის“ რუსული გამოცემის სიაში 59-ე ადგილს იკავებს და მისი ქონება 1,5 მილიარდ დოლარად ფასდება. ის ტიტანის მწარმოებელი ერთ-ერთი უმსხვილესი რუსული კომპანიიის, VSMPO-AVISMA-ს ძირითადი ბენეფიციარი და დირექტორთა საბჭოს თავმჯდომარის მოადგილეა. შელკოვი ასევე ხელმძღვანელობდა რუსეთის სახელმწიფო კომპანიის, „როსტეხის“ საინვესტიციო განყოფილებას.
გასულ წელს უკრაინის ხელისუფლებამ შელკოვს სანქციები დაუწესა.
სასამართლოს გადაწყვეტილებით, შელკოვს ჩამოერთმევა ბინები ოდესასა და ნიკოპოლში, ხუთი ავტომობილი, საწყობი, ფული ანგარიშებზე და უკრაინაში არსებული ტიტანის საწარმოს საწესდებო კაპიტალის 100%-იანი წილი.
