პოლიტიკოს მამუკა გამყრელიძის შეფასებით, რუსეთის სახელმწიფო დუმის ახალი შემადგენლობის შეკრების შემდეგ საკადრო სიურპრიზები მოსალოდნელი არ არის, ხოლო კრემლის სავარაუდო გეგმები მიუთითებს, რომ რუსეთი უკრაინაში ომის დასრულებას არ აპირებს.
როგორც გამყრელიძე სოციალურ ქსელში წერს, არჩევნებამდე არსებობდა ინტრიგა, შეიცვლებოდნენ თუ არა სახელმწიფო დუმის თავმჯდომარე და პრემიერ-მინისტრი, თუმცა ვლადიმირ პუტინმა არჩევნების შემდეგ ღიად დაუჭირა მხარი ვიაჩესლავ ვოლოდინსა და მიხაილ მიშუსტინს.
„ხვალ რუსეთის დუმის ახალი შემადგენლობა პირველ სესიაზე შეიკრიბება. არჩევნებამდე არსებობდა ერთგვარი ინტრიგა, შეიცვლებოდა თუ არა დუმის თავმჯდომარე ან პრემიერი, მაგრამ არჩევნების შემდეგ პუტინმა ღიად დაუჭირა მხარი ვოლოდინსა და მიშუსტინს. სიურპრიზებს აღარ უნდა ველოდოთ“, – წერს გამყრელიძე.
მისივე თქმით, როგორც სამთავრობო, ისე ოპოზიციური რუსი ანალიტიკოსები ვარაუდობენ, რომ კრემლი რეგიონებში ძალოვანი სტრუქტურების წარმომადგენლების, პირველ რიგში კი სამხედროების დანიშვნას დაიწყებს.
გამყრელიძის შეფასებით, ეს გარემოება ომის გაგრძელების განზრახვაზე მიუთითებს. ამასთან, მისი აზრით, ომის დასრულებას ორივე ქვეყნისთვის ტერიტორიულ საკითხებთან დაკავშირებული საკონსტიტუციო წინააღმდეგობები ართულებს.
„ამისთვის დუმამ უნდა მიიღოს საკონსტიტუციო ცვლილებები და ამოიღოს ოკუპირებული უკრაინული ტერიტორიები, რომლებიც რუსეთის კუთვნილებად თავად ცნო. ეს რუსეთის კაპიტულაცია იქნებოდა. სჯერა კი ვინმეს, რომ ბირთვული სახელმწიფო ამაზე დათანხმდება?“ – აღნიშნავს პოლიტიკოსი.
გამყრელიძე მიიჩნევს, რომ ტერიტორიულ დათმობაზე ვერც უკრაინა წავა, რადგან ეს მისთვისაც კაპიტულაციის ტოლფასი იქნებოდა.
„გამოდის, რომ მანაც უნდა იომოს, სანამ ერთ-ერთი ბოლომდე არ გამოიფიტება დემოგრაფიულად და ეკონომიკურად. დღეისთვის კი ამ ომში ცუგცვანგია. კარგი გამოსავალი არ ჩანს“, – წერს მამუკა გამყრელიძე.
